काठमाडौं (हाम्रो खेलकुद)– नेपाली महिला टोलीकी सदस्य प्रतिभा मालि र कोपिला उप्रेतीको टोली मिस्कियागु इजी माल्दिभ्स राष्ट्रिय महिला भलिबल च्याम्पियनसिपको फाइनलमा प्रवेश गरेको छ । मिस्कियागुले माल्दिभियन स्पोर्ट्स एन्ड रिक्रियसन क्लब ३–० को सोझो सेटमा हराउँदै अन्तिम दुईमा स्थान सुरक्षित गरेको हो । लिगमा शीर्ष दुईस्थानमा रहेको टोलीको बीचको प्रतिस्पर्धातमा मिस्कियागु इजी २५–२०,२५–१५ र २५–१७ ले खेल आफ्नो पक्षमा पारेको थियो ।

आजको खेल गुमाएपछि माल्दिभियनसँग फाइनल पुग्नका लागि अझै एउटा सम्भावना बाँकी छ । टोलीले अर्को खेलमा पुलिस क्लबसँग खेल्ने छ । पुलिसले नेपाली दुई खेलाडी अरुणा शाही र मञ्जु गुरुङको टोली फायस्दालाई आइतबार हराएर सेमिफाइनलमा स्थान बनाएको थियो । पुलिस र माल्दिभियनबीचको विजेताले बिहीबार मिस्कियागुसँग फाइनल खेल्नेछ । मिस्कियागु इजीले लिग चरणमा पनि माल्दिभियनलाई हराएको थियो । अर्को खेलमा भने माल्दिभियनले पुलिसलाई सोझो सेटमा पराजित गरेको थियो । लिग चरणमा माल्दिभियन शीर्षस्थानमा रहेको थियो भने मिस्कियागु इजी दोस्रो, पुलिस तेस्रो र फायस्दा चौथो स्थानमा रहँदै च्याम्पियनसिपका लागि छनोट भएका थिए । प्रतिभा र कोपिलाको व्यवस्थापकका रुपमा माल्दिभ्स पुगेकी नेपाल भलिबलकी कोषाध्यक्ष सुनकेशरी मालीका अनुसार लिग चरणपछि सबै टोली खेलाडी थपेको छन् । एउटा टोलीले दुई विदेशी खेलाडी खेलाउन पाउनेछन् । मिस्यिागु इजीले पनि एक थाइल्यान्डकी खेलाडीलाई टोलीमा समावेश गरेको छ । तीनै खेलाडी सोमबारको खेलमा मस्ट भ्यालुयवल प्लेयर घोषित भएकी थिइन् ।