काठमाडौं (हाम्रो खेलकुद) – जयराम श्रेष्ठ र कुमार कामी सुर्य नेपाल गल्फ टुर २०२१-२२ अन्तर्गत सिजनको पहिलो प्रतियोगिता सुर्य नेपाल काठमाडौं ओपनको पहिलो दिन संयुक्त अग्रतामा छन् ।

काठमाडौंस्थित रोयल नेपाल गल्फ क्लबमा सोमबार सुरु भएको प्रतियोगिताको पहिलो दिन जयराम र कुमारले ६ अन्डर ६२ को स्कोर जोडे । तेस्रो स्थानमा रहेका नेपाल नम्बर १ भुवन नगरकोटी र भुवन कुमार रोक्का ५ अन्डर ६३ अंक जोडेका छन् । त्यस्तै पाँचौ स्थानमा ४ अन्डर ६४ अंक जोडेका रवी खड्का छन् ।

त्रिभुवन आर्मी अफिसर्स गल्फ क्लबका धनबहादुर थापा र संजय लामा १ अन्डर ६७ अंकसहित संयुक्त छैटौं स्थानमा रहेका छन् । आठौं स्थानमा कृष्णमान राजवाहक, दीनेश प्रजापति र रमेश अधिकारीले इभन पार ६८ स्कोर जोडेका छन् । एमेच्योरतर्फ शीर्ष स्थानमा रहेका १३ औं सागका स्वर्ण विजेता सुभाष तामाङ पनि इभन पार ६८ स्कोरमा छन् ।

कुमारले फ्रन्ट र ब्याक नाइन दुवैमा ३ अन्डर ३१ को स्कोर जोडे । उनले पहिलो, चौथो, पाँचौ, दशौं, ११ औं र १२ औं होलमा बर्डी प्रहार गरेका थिए । त्यस्तै जयरामले पहिलो होलमा इगल तथा तेस्रो र सातौँमा बर्डी प्रहार गर्दा नवौं होलमा बोगी खेपे । ब्याक नाइनको ११ औं, १३ औं र १६ औं होलमा बर्डीसहित उनले ६ अन्डर ६२ को स्कोर बनाए ।

कुल ५५ गल्फर सहभागी प्रतियोगितामा ४० व्यावसायिक र १५ एमेच्योर गल्फर सहभागी छन् । दोस्रो दिनको खेलपछि २१ व्यावसायिक र ६ एमेच्योर गल्फरले अन्तिम दुई चरणमा प्रतिस्पर्धा गर्नेछन् । प्रतियोगिताको कुल पुरस्कार राशी ६ लाख ४० हजार रुपैयाँ रहेको छ । विजेताले १ लाख १० हजार रुपैयाँ प्राप्त गर्दा उपविजेताले ७४ हजार तथा तेस्रोले ६० हजार रुपैयाँ पाउनेछन् ।