काठमाडौं (हाम्रो खेलकुद) – बंगलादेशको ढाकामा हुने आयोजना एभीसी एसियन सेन्ट्रल जोन महिला तथा पुरुष भलिबल च्याम्पियनसिपको लागि राष्ट्रिय पुरुष भलिबल टोलीको छनोटको दोस्रो चरणमा १६ खेलाडी छनोट भएका छन् ।

मुख्य प्रशिक्षक हान एबिङले प्रारम्भिक टोलीमा रहेका २० खेलाडीबाट दोस्रो चरणमा १६ खेलाडी छनोट गरेका हुन् । पहिलोपटक राष्ट्रिय टोलीको प्रशिक्षणमा परेका धिरज बस्नेतले १६ सदस्यीय टोलीमा चरणमा स्थान बनाउन सफल भएका छन् । यस्तै राष्ट्रिय टोलीमा पूनरागमन गर्ने प्रयासमा रहेका मानबहादुर श्रेष्ठ र भैरव बम पनि १६ सदस्यीय टोलीमा समेटिएका छन् ।

पहिलोपटक प्रारम्भिक टोलीमा परेका झमन सिंह दर्जीसँगै दिल बहादुर सुनार दोस्रो चरणमा पर्न असफल भएका छन् । यस्तै विजय थापा र दुर्गा महतोले पनि दोस्रो चरणमा स्थान बनाउन सकेनन् ।

गत ३ मंसिरमा मुख्य प्रशिक्षक हान एबिङले २० सदस्यीय टोलीको घोषणा गर्दै प्रशिक्षण सुरुवात गरेका थिए । एभीसी एसियन सेन्ट्रल जोन महिला तथा पुरुष भलिबल च्याम्पियनसिप आगामी डिसेम्बर २१ देखि २९ सम्म सञ्चालन हुँदैछ ।

यसअघि संघले शनिबार १५ सदस्यीय टोली घोषणा गरेको थियो । संघले १२ डिसेम्वरमा अन्तिम १२ सदस्यीय टोली घोषणा गर्ने जनाएको छ ।

१६ सदस्यीय टोलीः

इम बहादुर राना, हरि हजुर थापा, मानबहादुर श्रेष्ठ, धनबहादुर भट्ट क्षेत्री, राजेन्द्र विष्ट, धिरज बस्नेत, टेकराज अवस्थी, हरि बहादुर अधिकारी, दुर्गा बहादुर खड्का, भैरव बम, दिपकराज जोशी, विशाल विक, सरन सामरी क्षेत्री, रविन चन्द, विनोद चन्द र इश्वर थापा