काठमाडौं (हाम्रो खेलकुद) – नेपाल भलिबल संघले डिसेम्बर तेस्रो सातामा बंगलादेशमा हुने एभिसी सेन्ट्रल जोन भलिबल प्रतियोगिताका लागि टोली छनोट गर्दा स्पाइकर रेश्मा भण्डारीसँगै ५ खेलाडी छनोटबाट बाहिरिएका छन् ।

प्रशिक्षणमा सहभागी २० खेलाडीबाट शनिबार १५ सदस्यीय टोली घोषणा गरिएको छ । संघले १२ सदस्यीय अन्तिम टोली अर्को साता घोषणा गर्ने जनाएको छ । शनिबार घोषित टोलीमा यसअघिको २० सदस्यीय टोलीबाट उषा विष्ट, जानकी भण्डारी, पुनम चन्द, शान्तिकला तामाङ र रेश्मा भण्डारी टोलीबाट बाहिरिएका छन् ।

रेश्मा लामो समयदेखि राष्ट्रिय टोलीबाट खेल्दै आएकी थिइन् । पछिल्लो समय घरेलु भलिबलमा समेत एपिएफबाट अपेक्षित प्रदर्शन गर्न नसकेकी रेश्मा छनोटबाट नै बाहिरिएकी हुन् । मिडल ब्लकर उषा विष्ट र लिबेरो शान्तिकला तामाङ भने चोटका कारण संघर्षरत थिए । यस्तै सन् २०१९ मा भएको सेन्ट्रल जोन भलिबल र १३ औं सागमा टोलीमा रहेका जानकी भण्डारी र पुनम चन्दले पनि छनोट चरण पार गर्न सकेनन् ।

नेपाली महिला टोली पहिलो संस्करणको सेन्ट्रल जोनको च्याम्पियन टोली हो । सन् २०१९ मा बंगलादेशमै भएको सेन्ट्रल जोनमा नेपाल एक सेट पनि नगुमाई अपराजित रहँदै च्याम्पियन बनेको थियो । यसपटक पनि नेपालको लक्ष्य च्याम्पियन बन्ने हुनेछ । प्रतियोगिता २१ देखि २९ डिसेम्बरसम्म हुँदैछ ।

१५ सदस्यीय टोली :

प्रतिभा माली, सरस्वती चौधरी, शान्ति थारु, निरुता ठगुन्ना, उषा भण्डारी, सफिया पुन, मनिषा चौधरी, कविता भट्ट, सलिना श्रेष्ठ, सरस्वती जैसी, अरुणा शाही, कृपा अधिकारी, लक्ष्मी चन्द, कामना विष्ट, सुनिता खड्का