माल्दिभ्समा प्रतिभा र कोपिलाको टोलीसँग मञ्जु र अरुणाको टोली पराजित

काठमाडौं (हाम्रो खेलकुद) – माल्दिभ्सको महिला भलिबल लिगमा बिहीबार नेपाली राष्ट्रिय टोलीकी प्रतिभा माली र कोपिला उप्रेती सम्मिलित टोलीले मिस्कियागु इजीले नेपाली टोलीकै सदस्य मञ्जु गुरुङ र अरुणा शाही रहेको टोली फेयस्दालाई पराजित गरेको छ ।

लिगको आफ्नो अन्तिम खेलमा मिस्कियागु इजीले २५–२३, २६–२४, २५–२२ को प्रतिस्पर्धा जित हासिल गरेको थियो । मिस्कियागु इजीको लिगमा यो तेस्रो जित हो भने फेयस्दाको तेस्रो हार । मिस्यियागुको हरेक जितमा प्रतिभा मालि क्विन अफ दी म्याच रहन सफल भइन् । महिला लिगमा ५ टोलीको सहभागिता रहेको छ । हरेक टोलीले दुई विदेशी खेलाडी राख्न पाउने प्रावधान अनुसार नेपाली चार जनाले माल्दिभ्समा व्यवसायिक लिग खेल्ने मौका पाएका हुन् । कोपिला यसअघि नै माल्दिभ्स लिगमा खेलिसकेकी थिइन् भने अन्य तीन खेलाडीले पहिलो पटक मौका पाएका हुन् ।