सुबास हुमागाईं, काठमाडौं

विश्व बक्सिङको सर्वोच्च निकाय अन्तर्राष्ट्रिय बक्सिङ संघका अध्यक्ष उमार क्रेम्लेभ बुधबार नेपाल आइपुगेका छन् । नेपाल बक्सिङ संघको निमन्त्रणामा क्रेम्लेभ दुई दिने भ्रमणका लागि नेपाल आइपुगेका हुन् ।

रुसी नागरिक क्रेम्लेभसहित आइबाको ८ सदस्यीय टोली २ दिनको लागि नेपाल आएको हो । भ्रमणका क्रममा क्रेम्लेभले विभिन्न निकायसँग भेटघाटका साथै सातदोबाटोमा जारी प्रकाश दाहाल स्मृति राष्ट्रिय बक्सिङ प्रतियोगिता पनि हेर्ने कार्यक्रम छ । उनी विहीबार स्वदेश फर्कनेछन् । विमानस्थलमा स्थानीय नेवारी भेषभुषासहितको झाँकीले उनलाई स्वागत गरेको थियो । नेपाल बक्सिङ संघका अध्यक्ष राम अवाले, महासचिव सविन भट्टाचार्य लगायत पदाधिकारीको उपस्थिति रहेको थियो ।

बुधबार विमानस्थलमा आइपुगेपछि क्रेम्लेभले आफू नेपाली बक्सिङलाई नजिकबाट नियाल्दै खेलको विकासमा सहयोग गर्न आएको बताए । ‘मैले विदेशमा नेपाली खेलाडीहरु खेलेको हेरेको छु । यसपटक नेपाल बक्सिङ संघले मलाई निम्तो दियो । यहाँ बक्सिङ कस्तो छ हेर्दै आफ्नो व्यक्तिगत तर्फबाट सहयोग गर्नेछु । यहाँका खेलाडीलाई पुरस्कृत गर्नेछु । नेपालको बक्सिङ विकास गर्न के कस्तो कदम चाल्न सकिन्छ हेर्नेछु,’ उनले भने ।

क्रेम्लेभले नेपालको हिमालजस्तै बक्सिङलाई पनि उच्च विन्दुमा पुर्याउन सकिने बताए । ‘नेपालमा अग्लो हिमालहरु छन् । यहाँका खेलाडी पनि बलिया छन् । अब यहाँको बक्सिङलाई उच्च विन्दुमा पुर्याउन आवश्यक कदम चाल्नेछौं । हामीले यहाँ सरकरसँग पनि छलफल गर्नेछौं । आशा गरौँ फलदायी नै हुनेछ,’ उनले थपे ।

नेपाल बक्सिङ संघका अध्यक्ष राम अवालेले क्रेम्लेभ नेपाल आउनु नै नेपालको लागि ठूलो भएको बताए । ‘आइबा अध्यक्ष नेपाल आउनुभएको छ । हाम्रो निमन्त्रणा स्वीकार गर्नुभएकोमा धन्यवाद । अब यहाँको बक्सिङलाई वहाँले आफ्नै आँखाले नियाल्नु हुनेछ,’ अध्यक्ष अवालेले भने ।

क्रेम्लेभको आगमनको थप तस्बिरहरु यहाँ हेर्नुहोस