एजेन्सी – पछिल्लो समय अन्तर्राष्ट्रिय क्रिकेटमा न्युजिल्यान्डले उत्कृष्ट प्रदर्शन गर्दै आएको छ । त्यस्तै उत्कृष्ट प्रदर्शनका साथ न्युजिल्यान्डले आइसिसी टि२० विश्वकप २०२१ मा अष्ट्रेलियासँग आज फाइनल खेल्दैछ । दुबई इन्टरनेशल क्रिकेट स्टेडियममा नेपाली समय अनुसार बेलुका ७ : ४५ मा सुरु हुनेछ ।

न्युजिल्यान्डलाई पहिलो पटक विश्वकप उपाधि जित्ने सोचमा छ । हालसम्म न्युजिल्यान्डले कुनैपनि विश्वकप उपाधि जित्न सकेको छैन । टि२० मा न्युजिल्यान्ड पहिलो पटक फाइनलमा पुगेको हो । ओडिआईमा २०१५ र २०१९ मा लगातार फाइनल खेलेपनि उपाधि जित्न सकेको थिएन । यो पटक न्युजिल्यान्डलाई पहिलो पटक विश्वकप च्याम्पियन बन्ने अवसर छ । तर पाँच पटकको एकदिवसिय विश्वकप च्याम्पियन अष्ट्रेलियाविरुद्ध सहज भने हुने छैन ।

न्युजिल्यान्डले हालसम्म आइसिसी उपाधिको रुपमा टेस्ट च्याम्पियनसिप र च्याम्पियन्स ट्रफीको उपाधि मात्र जित्न सकेको छ । न्युजिल्यान्ड एकदिवसिय विश्वकप फाइनलमा २०१५ मा पहिलो पटक पुगेको थियो । तर अष्ट्रेलियासँगनै ७ विकेटले पराजित भएको थियो । कमजोर ब्याटिङका साथ १ सय ८३ रनमा अल आउट भएपछि उक्त लक्ष्य अष्ट्रेलियाले ३३.१ ओभरमा ३ विकेट गुमाउँदै पूरा गरेको थियो । न्युजिल्यान्ड त्यसको बदला लिन चाहन्छ ।

न्युजिल्यान्ड यसअघि टि२० विश्वकपमा दुई पटक सम्म सेमिफाइनलमा सिमित भएको थियो । पहिलो संस्करण २००७ को टि२० विश्वकपमा न्युजिल्यान्डले सेमिफाइनल पाकिस्तानसँग ६ विकेटले पराजित हुँदै बाहिरिएको थियो । त्यसपछि न्युजिल्यान्डले २०१६ मा भारतमा भएको विश्वकपमा सेमिफाइनलमा स्थान बनाएको थियो । २०१६ मा सुपर १० मा न्युजिल्यान्डले सानदार प्रदर्शनका साथ अपराजित रहँदै सेमिफाइनलमा पुगेको थियो । सेमिफाइनलमा इंग्ल्यान्डसँग ७ विकेटले पराजित हुँदै न्युजिल्यान्ड बाहिरिएको थियो ।

२०१९ को एकदिवसिय विश्वकप फाइनलमा न्युजिल्यान्ड इंग्ल्यान्डसँग बाउन्ड्री काउन्टको आधारमा पराजित भएको थियो । जितको लागि २ सय ४२ रनको विजयी लक्ष्य पछ्याएको इंग्ल्यान्ड ५० ओभरमा २ सय ४१ रन बनाएपछि खेल सुपर ओभरमा धकेलिएको थियो । तर सुपर ओभरमा जितको लागि १६ रन बनाउनु पर्ने अवस्थामा १५ रननै बराएर बराबर भएपछि इंग्ल्यान्ड बढी चौका र छक्का प्रहार गरेको आधारमा विजयी भएको थियो ।

गत जुनमा न्युजिल्यान्डले भारतलाई ८ विकेटले हराउँदै पहिलो पटक भएको टेस्ट च्याम्पियनसिपको उपाधि जितेको थियो । टेस्ट च्याम्पियनसिप अघि न्युजिल्यान्डले २००० मा केन्यामा आयोजना भएको आइसिसी नक आउट (च्याम्पियन्स ट्रफी) को फाइनलमा भारतलाई ४ विकेटले हराउँदै न्युजिल्यान्डले पहिलो पटक आइसिसी उपाधि जितेको थियो । २००९ को च्याम्पियन्स ट्रफीको फाइनलमा अष्ट्रेलियाले न्युजिल्यान्डलाई ६ विकेटले हराउँदै उपाधि जितेको थियो ।

न्युजिल्यान्डले आइसिसीका पछिल्ला तीनै प्रतियोगिता फाइनल खेलेको छ । कागजी रुपमा खासै स्टार खेलाडी नभएपनि मैदानमा सर्वोत्कृष्ट प्रदर्शनका साथ फाइनलमा स्थान बनाएको छ । केन विलियम्सनको उत्कृष्ट कप्तानी, अनुशासन, कडा मिहिनेत र टिम एकताको कारण सर्वोत्कृष्ट प्रदर्शन गर्दै आएको छ । यता अष्ट्रेलिया विश्व च्याम्पियन टोली हो । दुई च्याम्पियन्स ट्रफी र पाँच विश्वकप उपाधि जितेको छ । अष्ट्रेलियाले १८८७, १९९९, २००३, २००७ र २०१५ मा एकदिवसिय विश्वकप उपाधि जितेको थियो । २००६ र २००९ को च्याम्पियन्स ट्रफी उपाधि जितेको थियो । ओडिआई क्रिकेटमा राज गरेपनि टि२० आईमा त्यति धेरै सफल हुन सकेको छैन ।

अष्ट्रेलिया दोस्रो पटक टि२० विश्वकप फाइनल खेल्दै छ । २०१० मा अष्ट्रेलिया इंग्ल्यान्डसँग ७ विकेटले पराजित भएको थियो । अष्ट्रेलिया पहिलो पटक टि२० च्याम्पियन बन्न चाहन्छ । पछिल्लो समय आफ्नो उत्कृष्ट प्रदर्शनका साथ फाइनलमा स्थान बनाएको हो । यी दुई देशको वातावरण पनि एकै छ । युएई फरक रहेपनि उत्कृष्ट प्रदर्शन गर्दै आएका छन् । यी दुई छिमेकीबीचको भिड्न्त आज रोचक हुने अनुमान गरिएको छ । उपाधि जसले जितेपनि टि२० विश्वकपले आज नयाँ च्याम्पियन्स पाउनेछ ।