एजेन्सी – आइसिसी टि२० विश्वकप २०२१ मा सुपर १२ को समूह १ को अन्तिम खेलमा आज इंग्ल्यान्ड र दक्षिण अफ्रिकाबीच प्रतिस्पर्धा हुँदैछ । खेल नेपाली समय अनुसार बेलुका ७ ः४५ मा शारजाह क्रिकेट स्टेडियममा सुरु हुनेछ ।

इंग्ल्यान्ड ४ खेलमा ४ मानै जितका साथ ८ अंक जोड्दै शीर्ष स्थानमा छ । इंग्ल्यान्डको सेमिफाइनल पक्का भएपनि औपचारिकता बाँकी छ । इंग्ल्यान्ड आजको खेलमा विजयी भएमा समूह विजेताको रुपमा सेमिफाइनल खेल्नेछ । दक्षिण अफ्रिकालाई भने शीर्ष दुईमा रहेर सेमिफाइनल खेल्न आजको खेल जित्नै पर्ने दबाब छ ।

दक्षिण अफ्रिकालाई सेमिफाइनलमा पुग्न विशाल जितको आवश्यक पर्छ । अथवा अष्ट्रेलिया पहिलो खेलमा पराजित भएमा तथा दक्षिण अफ्रिकाले इंग्ल्यान्डलाई हराएमा सोझैं सेमिफाइनल खेल्नेछ । अष्ट्रेलिया र दक्षिण अफ्रिका दुबै पराजित भए वा विजयी भएमा एक टोली नेटरनरेटको आधारमा सेमिफाइनल खेल्नेछन् ।

अष्ट्रेलिया ४ खेलमा ३ मा जित र १ मा हार सहित ६ अंकका साथ दोस्रो स्थानमा छ । दक्षिण अफ्रिका ४ खेलमा ३ मा जित र १ मा हार सहित ६ अंक जोड्दै तेस्रो स्थानमा छ । इंग्ल्यान्डको नेटरनरेट प्लस ३.१८३ छ । अष्ट्रेलियाको प्लस १.०३१ र दक्षिण अफ्रिकाको प्लस ०.७४२ नेटरनरेट छ । सुरुवाती चार खेलमा लगातार जित हात पारेको इंग्ल्यान्डको सेमिफाइनल पक्का भएको छ ।

इंग्ल्यान्डले पहिलो खेलमा वेस्टइन्डिजलाई ६ विकेटले हराएको थियो । बंगलादेश र अष्ट्रेलियालाई ८–८ विकेटले हराएको थियो । श्रीलंकालाई २६ रनले हराउँदै सेमिफाइनल पक्का बनाएको थियो । दक्षिण अफ्रिका पहिलो खेलमा अष्ट्रेलियासँग ५ विकेटले पराजित भएको थियो । वेस्टइन्डिजलाई ८ र श्रीलंकालाई ४ विकेटले पराजित गरेको थियो । बंगलादेशलाई ६ विकेटले हराएको थियो । जितेका तीनै खेल लक्ष्य पछ्याउँदा हुँदा पहिला ब्याटिङ गर्नुपरे दक्षिण अफ्रिका समस्यामा पर्नसक्छ ।

इंग्ल्यान्डका ओपनर जस बटलर राम्रो लयमा छन् । श्रीलंकालाई हराउन बटलरले १ सय १ रनको उत्कृष्ट अविजित शतकीय इनिङ खेलेका थिए । बटलरको लयलाई रोक्न दक्षिण अफ्रिकी बलरलाई मुख्य चुनौती हुने देखिन्छ । पछिल्लो खेलमा कप्तान ओईन मोर्गनले पनि आफ्नो लयलाई फर्काउँदै ४० रन जोडेका थिए ।

इंग्ल्यान्डको ब्याटिङमा गहिराई छ । जेसन रोय, जोनी बेयरस्टो, डेविड मलान र लियाम लिभिङस्टोन जस्ता टि२० प्रमुख ब्याटर टोलीमा छन् । जसको कारण ठूलो लक्ष्य बनाउन र पूरा गर्न सजिलै सक्छन् । स्पिनर मोईन अली र आदिल राशिदको जोडीले लगातार राम्रो प्रदर्शन गर्दै आएका छन् । क्रिस जोर्डन, टाइमल मिल्स र क्रिस वोक्सले तीव्र गतिको बलिङ युनिट सम्हाल्दै आएका छन् ।

दक्षिण एडेन माक्ररम राम्रो लयमा छन् । क्विन्टन डी कक विश्वकपमा अपेक्षा अनुसार प्रदर्शन गर्न सकेका छैनन् । उनीबाट दक्षिण अफ्रिका महत्वपूर्ण खेलमा उत्कृष्ट इनिङ चाहन्छ । रास्सी भान डर डुसेनले मध्यक्रम सम्हाल्नेछन् । फिनिसरमा डेविड मिलर रहनेछन् । दक्षिण अफिा्रका मुख्य हतियार तीव्र गतिका बलर कागिसो रबाडा र एनरिच नोर्किया हुन् ।

यी दुई बलरको उत्कृष्ट प्रदर्शन विना दक्षिण अफ्रिकालाई जितको लागि कठिन पर्नेछ । स्पिनर तबरेज शाम्सीले लगातार उच्च प्रदर्शन गर्दै आएका छन् । उनी इंग्ल्यान्डका ब्याटरलाई टाउको दुखाईका स्पिनर बन्नसक्छन् ।

हेड टु हेड :

दक्षिण अफ्रिका र इंग्ल्यान्डबीच टि२० विश्वकपमा कुल ५ खेल भएका छन् । जसमा दक्षिण अफिा्रका तीन खेलमा विजयी हुँदा २ खेलमा पराजित भएको छ । २०१६ को टि२० विश्वकपमा दक्षिण अफ्रिकाले प्रस्तुत गरेको २ सय ३० रनको विशाल लक्ष्य इंग्ल्यान्डले १९.४ ओभरमा ८ विकेट गुमाउँदै पूरा गरेको थियो । तर पछिल्ला पाँच टि२० आई खेलमा दक्षिण अफ्रिकाले इंग्ल्यान्डलाई हराउन सकेको छैन । दक्षिण अफ्रिका र इंग्ल्यान्डबीच कुल २१ टि२० आई खेल भएको छ । जसमा इंग्ल्यान्ड ११ खेलमा विजयी हुँदा ९ खेलमा पराजित भएको छ ।