एजेन्सी – ओपनर मार्टिन गुप्टिलको उत्कृष्ट ब्याटिङमा न्युजिल्यान्डले आइसिसी टि२० विश्वकप २०२१ मा स्कटल्यान्डलाई १ सय ७३ रनको बलियो विजयी लक्ष्य दिएको छ ।

दुबई इन्टरनेशल क्रिकेट स्टेडियममा टस हारेर ब्याटिङको निम्तो पाएको न्युजिल्यान्डले निर्धारित २० ओभरमा ५ विकेट गुमाउँदै १ सय ७२ रन बनायो । न्युजिल्यान्डका ओपनर मार्टिन गुप्टिलले ५६ बलमा ६ चौका र ७ छक्का सहित सर्वाधिक ९३ रनको योगदान दिए । ब्राडली व्हीलले १९ औं ओभरको तेस्रो बलमा कलम म्याकलडबाट क्याच गराएपछि गुप्टिल शतक बनाउन चुकेका थिए । ग्लेन फिल्पिस ३७ बलमा १ छक्का सहित ३३ रनमा क्याच आउट भए ।

खराब सुरुवात गरेको न्युजिल्यान्डलाई चौथो विकेटका लागि गुप्टिल र फिलिप्सले १ सय ५ रनको महत्वपूर्ण शतकीय साझेदारी गर्दै बलियो योगफलमा पुर्याएका थिए । पाँचौं ओभरमा न्युजिल्यान्डले प्रमुख दुई विकेट गुमाएको थियो । पाँचौं ओभरको पहिलो बलमा सफ्यान शारीफले १३ रनमा एलबीडब्लू आउट गर्दै स्कटल्यान्डलाई पहिलो सफलता दिलाएका थिए ।

चार बलपछि कप्तान केन विलियम्सन शून्यमा म्याथ्यु क्रसबाट क्याच आउट भएका थिए । मार्क वाटले छैटौं ओभरको पहिलो बलमा डेवन कन्वेलाई १ रनमा क्रसबाटै क्याच गराएपछि ५२–३ को कमजोर अवस्थामा पुगेको थियो । जेम्श निसम ८ र मिचेल सान्टनार २ रनमा अविजित रहे ।

स्कटल्यान्डका सफ्यान शारिफले ४ ओभरमा २८ रन खर्चेर सर्वाधिक २ विकेट लिए । ब्राडली व्हीलले ४ ओभरमा ४० रन खर्चेर २ विकेट लिए । मार्क वाटले ४ ओभरमा १३ रन खर्चेर १ विकेट लिए ।