एजेन्सी – पाकिस्तानले लगातार चौथो जितको साथ आइसिसी टि२० विश्वकप २०२१ को सेमिफाइनलमा पुगेको छ । मंगलबार राती सुपर १२ को २ मा रहेको पाकिस्तानले नामिबियालाई ४५ रनले हराउँदै पाँचौं पटक टि२० विश्वकपको सेमिफाइनलमा पुगेको हो ।

जितको लागि १ सय ९० रनको विजयी लक्ष्य पछ्याएको नामिबियाले निर्धारित २० ओभरमा ५ विकेट गुमाउँदै १ सय ४४ रन बनायो ।नामिबियाका लागि डेविड विसे ३१ बलमा ३ चौका र २ छक्का सहित सर्वाधिक ४३ रनमा अविजित रहे । क्रेग विलियम्सले ३७ बलमा ५ चौका र १ छक्का सहित ४० रनको योगदान दिए ।

ओपनर स्टेफन ब्रान्ड २९ बलमा १ चौका र १ छक्का सहित २९ रनमा रन आउट भए । कप्तान गेरहार्ड इरास्मस १५ र जेजे स्मित २ रनमा आउट भए । पाकिस्ताानका हसन अली, ईमाद वासिम, हरि रौफ र शादब खानले १–१ विकेट लिए ।

शेख जायद स्टेडिम आबूधाबीमा टस जितेर पहिला ब्याटिङ थालेको पाकिस्तानले निर्धारित २० ओभरमा २ विकेट गुमाउँदै १ सय ८९ रन बनायो । पाकिस्तानका ओपनर मोहम्मद रिजवान ५० बलमा ८ चौका र ४ छक्का सहित सर्वाधिक ७९ रनमा अविजित रहे ।

रिजवानले अन्तिम ओभरमा जेजे स्मितलाई ४ चौका र १ छक्का सहित कुल २४ रन जोडेका थिए । कप्तान बाबर आजम ४९ बलमा ७ चौका सहित ७० रनको योगदान दिए । मोहम्मद हफिज १६ बलमा ५ चौका सहित ३२ रनमा अविजित रहे । पाकिस्तानलाई ओपनर बाबर आजम र रिजवानले १४.२ ओभरमा १ सय १३ रनको साझेदारी गर्दै सुरुवात दिलाएका थिए । डेविड विसे ले बाबरलाई क्याच गराउँदै साझेदारी तोडेका थिए । फखार जमान ५ रनमा आउट भए ।

नामिबियाले उत्कृष्ट बलिङका साथ पहिलो पावर प्ले अर्थात सुरुवाती ६ ओभरमा मात्र २९ रन दिएको थियो । सुरुवाती १० ओभरमा पाकिस्तानले कुनै विकेट नगुमाउँदै ५९ रन जोडेको थियो । पाकिस्तानले अन्तिम १० ओभरमा १ सय ३० रन जोड्दै विशाल योगफल बनाएको हो । नामिबियाका डेविड विसे र जान फ्रिलिंकले १–१ विकेट लिए ।

पाकिस्तान पाँचौं पटक सेमिफाइनलमा पुगेको हो । २००७ को टि२० विश्वकप फाइनलमा भारतसँग ५ रनले पराजित हुँदै उपविजेता बनेको थियो । पाकिस्तानले २००९ को विश्वकप फाइनलमा श्रीलंकालाई ८ विकेटले हराउँदै उपाधि जितेको थियो । २०१० र २०१२ विश्वकपमा पाकिस्तान सेमिफाइनलबाट बाहिरिएको थियो । पाकिस्तान ४ खेलमा ४ मानै जितका साथ शीर्ष स्थानमा छ । अन्तिम खेलमा पाकिस्तानले स्कटल्यान्डसँग आइतबार खेल्नेछ ।

उक्त खेलमा विजयी भएमा समूह विजेता हुनेछ । पराजित भएमा पनि नेटरनरेटको आधारमा विजेता बन्ने निश्चित जस्तै बनेको छ । समूह २ मा अव ८ अंकको दौंडमा न्युजिल्यान्ड मात्र बाँकी छ । पाकिस्तानले पहिलो खेलमा भारतलाई १० विकेट, दोस्रो खेलमा न्युजिल्यान्ड र तेस्रो खेलमा अफगानिस्तानलाई समान ५–५ विकेटले हराएको थियो ।

न्युजिल्यान्डले अफगानिस्तालाई हराएको खण्डमा सेमिफाइनल खेल्ने लगभग निश्चित जस्तै छ । न्युजिल्यान्डले जित्दा भारत र अफगानिस्तान स्वत बाहिरिने छन् । भारत भने समूह चरणबाटै बाहिरिने उच्च सम्भावना छ । अन्तिम खेलमा न्युजिल्यान्डलाई हराउन सके अफगानिस्तान सेमिफाइनलमा जानेछ । न्युजिल्यान्ड र अफगानिस्तानबीचको खेल आइतबार हुनेछ । न्युजिल्यान्डले अव नामिबिया र स्कटल्यान्डसँग खेल्ने बाँकी छ । भारतले अफगानिस्तान, नामिबिया र स्कटल्यान्डसँग खेल्नेछ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंकका साथ दोस्रो स्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ४ खेलमा ४ मानै पराजित हुँदै पुछारमा छ । श्रीलंका र बंगलादेश बाहिरि सकेका छन् ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड २ खेलमा १ मा जित र १ मा हार सहित तेस्रो स्थानमा छ । नामिबिया ३ खेलमा १ मा जित र २ मा हार सहित चौथो स्थानमा छ । समान २ खेल खेलेका भारत र स्कटल्यान्ड अंक विहीन हुँदै पाँचौं र छैटौं स्थानमा छन् ।