एजेन्सी – आइसिसी टि२० विश्वकप सुपर १२ को समूह ए मा रहेको वेस्टइन्डिज पहिलो खेलमै इंग्ल्यान्डसँग ५५ रनमा अल आउट भएको छ । दुबई इन्टरनेशनल क्रिकेट मैदानमा टस हारेर ब्याटिङको निम्तो पाएको वेस्टइन्डिज १४.२ ओभरमा ५५ रनमा अल आउट भएको हो ।

साविक विजेता वेस्टइन्डिजका क्रिस गेलले १३ बलमा ३ चौका सहित सर्वाधिक १३ रन बनाए । टि२० क्रिकेटको पावर हाउस वेस्टइन्डिज खराब ब्याटिङ गरेको हो । विश्व क्रिकेटमा टि२० खेलाडीको बाहुल्यता भएको वेस्टइन्डिजका १० खेलाडीले दोहोरो अंकमा रन बनाउन सकेनन् ।

तीव्र गतिका बलर क्रिस वोक्सले ओपनर इविन लेविसलाई दोस्रो ओभरको तेस्रो बलमा ६ रनमा क्याच गराउँदै इंग्ल्यान्डलाई पहिलो सफलता दिलाएका थिए । स्पिनर मोईन अलीले तेस्रो ओभरको दोस्रो बलमा अर्का ओपनर लेन्डन सिमन्सलाई ३ रनमा लियाम लिभिङस्टोनबाट क्याच गराए । अलीलेनै पाँचौं ओभरको चौथो बलमा युवा ब्याटर शिम्रन हेटमायरले मोर्गनबाट ९ रनमा क्याच आउट गराएपछि वेस्टइन्डिजले खराब सुरुवात गरेको थियो ।

वेस्टइन्डिजको खराब सुरुवातलाई मध्यक्रम र तल्लोक्रमका ब्याटरले पनि सम्हाल्न सकेनन् । तीव्र गतिका बलर टायमल मिल्सले छैटौं ओभरको अन्तिम बलमा वेस्टइन्डिजका सर्वाधिक अनुवभी तथा सफल ब्याटर क्रिस गेललाई क्याच गराउँदा पहिलो पावरप्लेमै वेस्टइन्डिज ३१–४ को कमजोर अवस्थामा पुगेको थियो ।

ड्वेन ब्राभो ५ रनमा क्याच आउट भए । मिल्सले नवौं ओभरको पाँचौ बलमा निकोलस पूरनलाई १ रनमा जस बटलरबाट क्याच आउट गराए । वेस्टइन्डिजका अन्तिम आशा तथा प्रमुख हतियार आन्द्रे रसेलले खाता खोल्न सकेनन् । ११ औं ओभरको पहिलो बलमा आदिल राशिदले रसेललाई शून्यमा बोल्ड आउट गरेका थिए । राशिदलेनै काइरन पोलार्डलाई ६ रनमा क्याच गराएपछि सम्पूर्ण आशा सकिएको थियो ।

इंग्ल्यान्डका स्पिनर आदिल राशिदले २.२ ओभरमा २ रन खर्चेर ४ विकेट लिए । मोइन अली र टायमल्स मिल्सले २-२ विकेट लिए । क्रिस वोक्स र क्रिस जोर्डनको नाममा १-१ विकेट रह्यो ।

टि२० विश्वकप इतिहासमा यो तेस्रो कम योगफल हो । यसअघि २०१४ को टि२० विश्वकपमा नेदरल्यान्ड्स श्रीलंकाविरुद्ध १०.३ ओभरमा ३९ रनमा अल आउट भएको थियो । शुक्रबार नेदरल्यान्ड्सनै श्रीलंकाविरुद्ध ४४ रनमा अल आउट भएको थियो । वेस्टइन्डिजको यो टि२० आईमा दोस्रो कम योगफल हो । यसअघि २०१९ मा वेस्टइन्डिज इंग्ल्यान्डसँग ४५ रनमा अल आउट भएको थियो ।