एजेन्सी – आइसिसी टि२० विश्वकप २०२१ अन्तर्गत सुपर १२ को समूह ए को पहिलो खेलमा अष्ट्रेलियाले दक्षिण अफ्रिकाविरुद्ध पहिला फिल्डिङ गर्ने भएको छ । शेख जायद स्टेडियम आबूधाबीमा अष्ट्रेलिया कप्तान आरोन फिन्चले टस जितेर पहिला फिल्डिङ गर्ने निर्णय लिएका हुन् ।

हालसम्म टि२० विश्वकप जित्न नसकेका यी दुई टोलीलाई यस पटक सेमिफाइनल सम्म पुग्नै चुनौती देखिन्छ । अष्ट्रेलिया पछिल्लो समय प्रदर्शन पनि राम्रो छैन । विशेष गरि प्रमुख ब्याटरको खराब लय अष्ट्रेलियालाई चिन्ताको विषय बनेको छ । वार्मअप खेलमा अष्ट्रेलियाले न्युजिल्यान्डलाई ३ विकेटले पराजित गरेको थियो । दोस्रो खेलमा भारतसँग ८ विकेटले पराजित भएको थियो ।

दक्षिण अफ्रिकाले वार्मअप खेलमा अफगानिस्तानलाई ४१ रन र पाकिस्तानलाई ६ विकेटले पराजित गरेको थियो । पाकिस्तानलाई हराउनेक्रममा दक्षिण अफ्रिकाले १ सय ८७ रनको विजयी लक्ष्य पूरा गरेको थियो । तेस्रो नम्बरका रास्सी भान डर डुसेनले १ सय १ रनको शतकीय इनिङ खेलेपछि दक्षिण अफ्रिकाले अन्तिम बलमा पूरा गरेको थियो ।

दक्षिण अफ्रिका प्लेइङ ११ : टेम्बा बभुमा (कप्तान), क्विन्टन डि कक, हेनरिक क्लासेन, केशव महाराज, एडेन माक्ररम, डेविड मिलर, एनरिच नोर्किया, डवेन प्यट्रियटर्स, कागिसो रबाडा, तबरेज शाम्सी र रास्सी भान डर डुसेन ।

अष्ट्रेलिया प्लेइङ ११ : आरोन फिन्च (कप्तान), प्याट कमिन्स (उपकप्तान), जोश हेजलवुड, मिचेल मार्श, ग्लेन म्याक्सवेल, स्टिभ स्मिथ, मिचेल स्टार्क, मार्कस स्टोइनिस, म्याथ्यु वेड, डेविड वार्नर र एडम जाम्पा ।

हेड टु हेड :

अष्ट्रेलिया र दक्षिण अफ्रिकाबीच कुल २१ टि२० आई खेल भएका छन् । अष्ट्रेलिया १३ खेलमा विजयी हुँदा ८ खेलमा पराजित भएको छ । पछिल्ला पाँच खेलमा अष्ट्रेलिया ३ खेलमा विजयी हुँदा २ खेलमा पराजित भएको छ । अष्ट्रेलिया पहिला ब्याटिङ गर्दा ४ र लक्ष्य पछ्याउँदा ७ पटक विजयी भएको छ । टि२० विश्वकपमा एक पटक मात्र यी दुई देशबीच भेट भएको छ । सन् २०१२ को टि२० विश्वकपमा अष्ट्रेलियाले दक्षिण अफ्रिकालाई ८ विकेटले पराजित गरेको थियो ।

विश्वकपमा यी दुई टोलीको इतिहास

दक्षिण अफ्रिका टि२० विश्वकपमा सन् २००९ र २०१४ मा सेमिफाइनल सम्म पुगेको थियो । टि२० विश्वकपमा दक्षिण अफ्रिकाले कुल ३० खेल खेलेको छ । जसमा १८ खेलमा विजयी हुँदा १२ खेलमा पराजित भएको छ । अष्ट्रेलिया २०१० को टि२० विश्वकपमा फाइनलमा इंग्ल्यान्डसँग पराजित भएको थियो ।

२००७ र २०१२ मा सेमिफाइनलमा पुगेको थियो । अष्ट्रेलियाले विश्वकपमा कुल २९ खेल खेल्दा १६ खेलमा जित र १३ खेलमा पराजित भएको छ । पछिल्ला १० खेल मध्य दक्षिण अफ्रिकाले ८ खेलमा जित निकालेको छ । अष्ट्रेलिया पछिल्ला १० खेल मध्य ४ मा विजयी भएको छ । आजको दोस्रो खेलमा वेस्टइन्डिज र इंग्ल्यान्डबीच ७ ः ४५ मा प्रतिस्पर्धा हुनेछ ।