एजेन्सी – इन्डियन प्रिमियर लिग (आइपिएल) २०२१ को पहिलो क्वालिफायर खेलमा दिल्ली क्यापिटल्सले चेन्नई सुपर किंग्सलाई १ सय ७३ रनको प्रतिस्पर्धात्मक लक्ष्य दिएको छ ।

दुबईमा टस हारेर ब्याटिङको निम्तो पाएको दिल्लीले निर्धारित २० ओभरमा ५ विकेट गुमाउँदै १ सय ७२ रन बनायो । दिल्लीका ओपनर पृथ्वी शाले ३४ बलमा ७ चौका र ३ छक्का सहित सर्वाधिक ६० रनको योगदान दिए । कप्तान ऋषभ पन्त ३५ बलमा ३ चौका र २ छक्का सहित ५१ रनमा अविजित रहे ।

दिल्लीलाई ओपनर पृथ्वी शा र शिखर धवनले पहिलो विकेटका लागि ३.२ ओभरमा ३६ रन जोड्दै राम्रो सुरुवात दिएका थिए । तीव्र गतिका बलर जोश हेजलवुडको बलमा धवन महेन्द्रसिंह धोनीबाट ७ रनमा समातिन पुगे । बाँकी १४ रन जोड्दा दिल्लीले युवा ब्याटर श्रेयस ऐरलाई १ रनमा गुमाएको थियो । हेजलवुडको छैटौं ओभरको तेस्रो बलमा ऐर ऋतुराज गायकवाडबाट १ रनमा समातिन पुगे ।

अक्षर पटेल ११ बलमा १ चौका सहित १० रनमा क्याच आउट भए । स्पिनर मोईन अलीको बलमार पटेल वैकल्पिक फिल्डर मिचेल सान्टनरबाट समातिन पुगेका थिए । स्पिनर रविन्द्र जडेजाको ११ औं ओभरको दोस्रो बलमा शा फाफ डु प्लेसिसबाट क्याच आउट भएका थिए ।

पाँचौं विकेटका लागि ऋषभ पन्त र शिम्रन हेटमायरले ८३ रनको साझेदारी गर्दै दिल्लीलाई बलियो अवस्थामा पुर्याएका थिए । ड्वेन ब्राभोले १९ औं ओभरको चौथो बलमा हेटमायरलाई जडेजाबाट ३७ रनमा क्याच आउट गराए । हेटमायरले २४ बलमा ३ चौका र १ छक्का प्रहार गरे ।

चेन्नईका जोश हेजलवुडले ४ ओभरमा २९ रन खर्चेर २ विकेट लिए । ड्वेन ब्राभो, रविन्द्र जडेजा र मोईन अलीले १–१ विकेट लिए ।