एजेन्सी – इन्डियन प्रिमियर लिग (आइपिएल) २०२१ को पहिलो क्वालिफायरमा आज चेन्नई सुपर किंग्स र दिल्ली क्यापिटल्सबीच प्रतिस्पर्धा हुँदैछ । खेल नेपाली समय अनुसार बेलुका ७ : ४५ मा दुबईमा हुनेछ ।

दिल्ली शीर्ष र चेन्नई दोस्रो स्थानमा रहँदै क्वालिफायर खेलेका हुन् । यस खेलको विजेताले फाइनलमा स्थान बनाउने छ । पराजित हुने टोलीले फाइनल प्रवेशका लागि दोस्रो क्वालिफायर खेल्ने अवसर पाउनेछ । सोमबार एलिमिटेनरमा रोयल च्यालेन्जर्स बेंगलोर र कोलकता नाइट राइडर्सबीच प्रतिस्पर्धा हुनेछ । एलिमिनेटरको विजेता र पहिलो क्वालिफायरमा पराजित हुने टोली फाइनल प्रवेशका लागि दोस्रो क्वालिफायर खेल्नेछन् ।

चेन्नईको कप्तान भारतीय पूर्व सर्वाधिक सफल महेन्द्रसिंह धोनीले गर्नेछन् । धोनीको कप्तानीमा चेन्नई ८ पटक फाइनल खेलेको छ । तीन पटक फाइनल जितेको छ । आइपिएलमा पहिलो पटक कप्तानी गरेका ऋषभ पन्त पहिलो प्रयासमै फाइनलमा पुर्याउन चाहन्छन् । दिल्लीले गतवर्ष पहिलो पटक फाइनलमा स्थान बनाएको थियो ।

दिल्लीले लिगका दुबै खेलमा चेन्नईलाई पराजित गरेको थियो । लिगमा दिल्ली ७ विकेट र ३ विकेटले विजयी भएको थियो । दिल्ली त्यहिँ नतिजालाई निरन्तरता दिने सोचमा छ । चेन्नई लिगको गल्तीबाट राम्रो पाठ सिक्दै फाइनलमा स्थान बनाउन चाहन्छ । दिल्ली लिगको अन्तिम खेलमा बेंगलोरसँग ७ विकेटले पराजित भएको थियो ।

दिल्लीको ब्याटिङ मजबुत र गहिराई छ । ओपनर पृथ्वी शा, शिखर धवन, ऋषभ पन्त, श्रेयस ऐर, शिम्रन हेटमायर जस्ता स्तरिय म्याच विनर ब्याटर दिल्लीमा छन् । धवन र शाले लगातार उत्कृष्ट प्रर्दशन गर्दै आएका छन् । यी दुई ओपनरबाट दिल्ली राम्रो सुरुवात चाहन्छ । पन्त र हेटमायरबाट दिल्ली आक्रामक ब्याटिङका साथ ठूलो इनिङ चाहन्छ ।

अक्षर पटेल र रविचन्द्रन आश्विन स्पिनर हतियार हुन् । तीव्र गतिका बलमा आवेश खान, कागिसो रबाडा र एनरिच नोर्किया छन् । रबाडा डेथ ओभरको लागि विश्व प्रसिद्ध बलर हुन् । नोर्किया आफ्नो गतीमा ब्याटरलाई दबाबमा राख्न सक्छन् । नोर्कियाले १ सय ५० किलोमिटर प्रतिघण्टा तीव्र गतिमा बलिङ गर्नेगर्दछन् । आवेश यस आइपिएलमा सर्वाधिक विकेट लिने दोस्रो बलर हुन् । आवेशले २२ विकेट लिई सकेका छन् । आवेश चेन्नईका ब्याटरलाई निराश बनाउन सक्छन् । पन्त, रबाडा र धवन मुख्य हतियार हुन् ।

यता चेन्नई लिगका पछिल्ला तीनै खेलमा पराजित भएको छ । चेन्नईका ओपनर फाफ डु प्लेसिस र ऋतुराज गायकवाड उच्च लयमा छन् । फाफ डु प्लेसिसले १४ खेलमा ५ अर्धशतक सहित कुल ५ सय ४६ रन बनाएका छन् । उनी सर्वाधिक रन बनाउने खेलाडीमा दोस्रो स्थानमा छन् । चौथो स्थानमा रहेका ऋतुराजले १४ खेलमा १ शतक सहित ५ सय ३३ रन बनाएका छन् । यी दुई खेलाडी चेन्नईका ब्याटिङका हतियार हुन् । मोईन अलीले पनि राम्रो गर्दै आएका छन् ।

सुरेश रैना, अम्बाती रायुडू, महेन्द्रसिंह धोनी जस्ता खेलाडी टोलीमा हुँदा ब्याटिङ मजबुत छ । तल्लोक्रममा रविन्द्र जडेजा र ड्वेन ब्राभो जस्ता विश्वस्तरिय अलराउन्डर छन् । शार्दूल ठाकुर, जोश हेजलवुड र दीपक चाहर तीव्र गतिका बलरको रुपमा खेल्नेछन् । दीपक र जोेश हेजलवुड पावर प्लेमा उत्कृष्ट प्रदर्शन गर्दै आएका छन् । ठाकूर उच्च लयका साथ निरन्तर विकेट लिँदै आएका छन् ।

चेन्नईमा अनुवभी खेलाडीको बाहुल्यता छ । दिल्लीमा युवा खेलाडीको जोश मिसिएको छ धोनी र पन्तलाई गुरु चेला पनि भन्ने गर्दछन् । दुबै टोली मजबुत, सन्तुलित हुनुको साथै विश्वस्तरिय म्याच विनर खेलाडी हुँदा खेलमा उच्च प्रतिस्पर्धा हुने अपेक्षा गरिएको छ ।

हेड टु हेड :

आइपिएलमा दिल्ली र चेन्नईबीच कुल २५ खेल भएको छ । चेन्नई १५ खेलमा विजयी हुँदा १० पराजित भएको छ । दिल्लीले पछिल्ला ५ खेल मध्य ४ खेलमा विजयी भएको छ । २०२० र २०२१ का लिगका सबै खेलमा दिल्ली विजयी भएको थियो ।

लिगमा दिल्ली १४ खेलमा १० मा जित र ४ मा हार सहित २० अंकका साथ शीर्ष स्थानमा रहँदै क्वालिफायर खेलेको हो । चेन्नई १४ खेलमा ९ मा जित र ५ मा हार सहित १८ अंकका साथ दोस्रो स्थानमा रह्यो । बेंगलोरको १४ खेलमा ९ मा जित र ५ मा हार सहित १८ अंकका साथ नेट रनरेटको आधारमा तेस्रो स्थानमा रहेको थियो ।

कोलकता १४ खेलमा ७ मा जित र ७ मा हार सहित १४ अंकका साथ अन्तिम चारमा स्थान पक्का गर्यो । एलिमिनेटर सोमबार र दोस्रो क्वालिफायर बुधबार हुनेछ । फाइनल शुक्रबार हुनेछ ।

यो पनि पढ्नुहोस् : आइपिएलको प्लेअफ समीकरण पूरा