एजेन्सी – इन्डियन प्रिमियर लिग (आइपिएल) २०२१ मा आज लिगका अन्तिम दुई खेल एकै समयमा हुँदैछन् । आइपिएल इतिहासमा एकै समयमा दुई खेल पहिलो पटक हुन लागेको हो ।

आवूधाबीमा मुम्बई इन्डियन्स र सनराइजर्स हैदराबादबीच प्रतिस्पर्धा हुनेछ । त्यसै समयमा दिल्ली क्यापिटल्स र रोयल च्यालेन्जर्स बेंगलोरबीच दुबई क्रिकेट मैदानमा प्रतिस्पर्धा गर्नेछन् । दुवै खेल नेपाली समय अनुसार बेलुका ७:४५ बजे सुरु हुनेछ । दिल्ली शीर्षस्थानमा रहँदै क्वालिफायर पुगिसकेको छ । बेंगलोर शीर्ष दुईमा रहने अंक गणीतिय सम्भावना मात्रै बाँकी छ । आजको खेलमा बेंगलोरले क्वालिफायरमा स्थान बनाउन दिल्लीलाई विशाल अन्तरले हराउनुपर्ने हुन्छ । सामान्य जितले भने शीर्ष दुईमा रहनसक्दैन ।

मुम्बईलाई शीर्ष चारमा रहन असम्भव मानिने समीकरण छ । मुम्बई पहिला बलिङ गर्नुपरेमा समीकरणनै समाप्त हुनेछ । पहिला ब्याटिङ गरेर हैदराबादलाई १ सय ७१ रन माथिको फराकिलो अन्तरको जित निकाल्न सकेमात्रै प्लेअफमा पुग्नेछ । त्यो भन्दा कमको जितले भने मुम्बई शीर्ष चारमा रहँदै प्लेअफ खेल्न सक्दैन । मुम्बईलाई यस सिजनमा प्रमुख ब्याटरको कमजोर प्रदर्शन निकै चिन्ताको विषय बनेको छ । कप्तान रोहित शर्मा प्रदर्शनलाई छाड्ने हो भनेअन्यको प्रदर्शन निकै कमजोर छ ।

सूर्यकुमार यादव, ईशान किशन, हार्दिक पान्ड्या र काइरन पोलार्ड चल्न नसक्दा पाँच पटकको विजेता मुम्बई लिगबाटै बाहिरिने लगभग पक्कापक्कि जस्तै भएको छ । तीव्र गतिका बलर जस्प्रित बुमराह प्रदर्शन छाड्ने हो भने अन्यको राम्रो छैन । पछिल्लो खेलमा नाथन कुल्टर नाइलले राम्रो बलिङ गरेका थिए । ट्रेन्ट बोल्टको प्रदर्शन अपेक्षा अनुसार हुन नसक्नु मुम्बईको लागि अर्को चिन्ताको विषय हो ।

हैदराबादलाई मुम्बईसँगको खेल प्रतिष्ठाको लडाई मात्रै हो । हैदराबाद अन्तिम खेलमा जितका साथ लिग अन्त्य गर्न चाहन्छ । पछिल्लो खेलमा बेंगलोरलाई ४ रनले पराजित गरेको हैदराबादको मनोबल उच्च छ । कप्तान केन विलियम्सन हैदराबादका प्रमुख हतियार हुन् । उनी प्रदर्शन मात्र नभएर कप्तानीमा पनि खेल जिताउन सक्ने अब्बल गुणका कप्तान हुन् । जेसन होल्डर र राशिद खान टोलीमा प्रमुख हतियार हुन् । कमजोर ब्याटिङ हैदराबादको मुख्य समस्या हो । आजको खेलमा हैदराबादले केहि नयाँ खेलाडीलाई अवसर दिनसक्छ ।

दिल्ली अन्तिम खेलमा जितका साथ उच्च मनोबलमा क्वालिफायर खेल्न चाहन्छ । दिल्लीले पछिल्लो खेलमा चेन्नईलाई ३ विकेटले पराजित गरेको थियो । दिल्लीले ब्याटिङ र बलिङ दुबैमा उच्च प्रदर्शन गरेको छ । दिल्लीको ब्याटिङमा गहिराइ छ । ओपनर शिखर धवन, पृथ्वी शा, श्रेयस ऐर ऋषभ पन्त र शिम्रन हेटमायर जस्ता ब्याटर टोलीमा हुँदा निकै मजबुत छ । तल्लोक्रममा अक्षर पटेल र रविचन्द्रन आश्विनले ब्याटिङको क्षमता राख्छन् ।

आवेश खान, कागिसो रबाडा र एनरिच नोर्कियाको कारण तीव्र गतिको बलिङ युनिट पनि निकै मजबुत छ । आवेश खानले लगातार उत्कृष्ट प्रदर्शन २२ विकेट लिइसकेका छन् । आश्विन र पटेल स्पिन हतियार हुन् । बेंगलोरका ग्लेन म्याक्सवेल उच्च लयमा छन् । म्याक्सवेलले पछिल्ला खेलमा लगातार उत्कृष्ट प्रदर्शन गर्दै आएका छन् । म्याक्सवेललाई विराट कोहली र एवि डिभिलियर्सले राम्रो साथ दिन आवश्यक देखिन्छ । डि भिलियर्स यस सिजनमा चल्न सकेका छैनन् ।

उनको लयले बेंगलोरलाई चिन्ता थपेको छ । खराब प्रदर्शन गरि रहेका ड्यानियल क्रिष्टियनको स्थानमा काइल जेमिसनले मौका पाउने सम्भावना छ । हर्षल पटेल दिल्लीलाई घातक बन्न सक्छन् । उनले यस सिजनको आइपिएलमा १३ खेलमा २९ विकेट लिएका छन् । उनलाई एकै सिजनमा सर्वाधिक विकेट लिने बलर बन्न ५ विकेट आवश्यक छ । एकै सिजनमा सर्वाधिक विकेट लिने कीर्तिमान ड्वेन ब्राभोको नाममा छ । उनले सर्वाधिक ३२ विकेट लिएका थिए ।

अंक तालिका

दिल्ली क्यापिटल्स १३ खेलमा १० मा जित र ३ मा हार सहित २० अंकका साथ शीर्षस्थानमा छ । चेन्नई सुपर किंग्स १४ खेलमा ९ जित र ५ मा हार सहित १८ अंकका साथ दोस्रो स्थानमा रहँदै लिग सकाएको छ । रोयल च्यालेन्जर्स बेंगलोर १३ खेलमा ८ मा जित र ५ मा हार सहित १६ अंकका साथ तेस्रो स्थानमा छ । कोलकाता १४ खेलमा ७ जित र ७ मा हार सहित १४ अंकका साथ चौथो स्थानमा छ । पन्जाब १४ खेलमा ६ मा जित र ८ मा हार सहित १२ अंकका साथ पाँचौं स्थानमा लिग समाप्त गरेको छ ।

मुम्बई १३ खेलमा ६ मा जित र ७ मा हार सहित १२ अंकका साथ छैटौं स्थानमा छ । राजस्थान रोयल्स १४ खेलमा ५ मा जित र ९ मा हार सहित १० अंकका सातौं स्थानमा छ । सनराइजर्स हैदराबाद १३ खेलमा १० मा हार र ३ मा जित सहित ६ अंकका साथ पुछारमा छ ।