एजेन्सी – कोलकता नाइट राइडर्सले इन्डियन प्रिमियर लिग (आइपिएल) मा राजस्थान रोयल्समाथि ८६ रनको सानदार जित निकाल्दै प्लेअफ नजिक पुगेको छ । यो जितसँगै कोलकता शीर्ष चारमा रहेर प्लेअफमा खेल्ने निश्चित जस्तै बनेको छ ।

जितको लागि १ सय ७२ रनको विजयी लक्ष्य पछ्याएको राजस्थान १६.१ ओभरमा ८५ रनमा अल आउट भएपछि कोलकता प्लेअफ औपचारिकता बाँकी छ । राजस्थानका लागि राहुल टेवाटियाले ३६ बलमा ५ चौका र २ छक्का सहित सर्वाधिक ४४ रनको योगदान दिए । शिवम दुबेले २० बलमा १ छक्का सहित १८ रन बनाए । राजस्थानका ९ खेलाडीले दोहोरो अंकमा रन बनाउन सकेनन् । यशस्वी जैसावल शून्य, लियाम लिभिङटोन, सन्जु स्यामसन १, अन्जु रावत शून्य, ग्लेन फिलिप्स ८ र जयदेव उनादकट ६ रनमा आउट भए ।

कोलकता युवा तीव्र गतिका बलर शिवम माभीले ३.१ ओभरमा २१ रन खर्चेर ४ विकेट लिए । लोकी फर्गुसनले ४ ओभरमा १८ रन खर्चेर ३ विकेट लिए । बरुणचक्रवर्ती र सकिब अल हसनले १–१ विकेट लिए । त्यसअघि शारजाहमा टस हारेर ब्याटिङको निम्तो पाएको कोलकताले निर्धारित २० ओभरमा ४ विकेट गुमाउँदै १ सय ७१ रन बनाएको थियो । कोलकता ओपनर सुभमन गिलले ४४ बलमा ४ चौका र २ छक्का सहित सर्वाधिक ५६ रन बनाए । वेंकटेश ऐरले ३५ बलमा ३ चौका र २ छक्का सहित ३८ रनको योगदान दिए । कोलकतालाई ओपनर १०.५ ओभरमा ओपनर गिल र ऐरले ७९ रनको साझेदारी गर्दै उत्कृष्ट सुरुवात दिलाएका थिए ।

नितिश राणा १२, राहुल त्रिपाठी २१, दिनेश कार्तिक १४ र ओईन मोर्गन १३ रन बनाए । राजस्थानका क्रिस मोरिस, चेतन सकारिया, राहुल टेवटिया र ग्लेन फिलिप्सले १–१ विकेट लिए ।

कोलकता प्लेअफ औपचारिकता बाँकी छ । कोलकता नेट रनरेटको आधारमा अन्तिम चारमा रहने पक्का जस्तै छ । मुम्बई इन्डियन्सले शुक्रबार सनराइजर्स हैदराबादाविरुद्ध खेल्दैछ । उक्त खेलमा कोलकतालाई पछि पार्न मुम्बईलाई २ सय ५० माथिको योगफल बनाउँदै १ सय ७१ रनको ठूलो फराकिलो जितको आवश्यक पर्छ । जसको कारण कोलकता प्लेअफ लगभग निश्चित बनेको छ ।

राजस्थान रोयल्स र पन्जाब किंग्स लिगबाटै बाहिरिएका छन् । हैदराबाद यसअघिनै बाहिरिएको थियो । दिल्ली शीर्ष स्थानमा रहँदै क्वालिफायरमा पुगेको छ । चेन्नई सुपर किंग्स पनि क्वालिफार औपचारिकता बाँकी छ ।

अंक तालिका

दिल्ली क्यापिटल्स १३ खेलमा १० मा जित र ३ मा हार सहित २० अंकका साथ शीर्षस्थानमा छ । चेन्नई सुपर किंग्स १४ खेलमा ९ जित र ५ मा हार सहित १८ अंकका साथ दोस्रो स्थानमा रहँदै लिग सकाएको छ । रोयल च्यालेन्जर्स बेंगलोर १३ खेलमा ८ मा जित र ५ मा हार सहित १६ अंकका साथ तेस्रो स्थानमा छ । कोलकाता १४ खेलमा ७ जित र ७ मा हार सहित १४ अंकका साथ चौथो स्थानमा छ । पन्जाब १४ खेलमा ६ मा जित र ८ मा हार सहित १२ अंकका साथ पाँचौं स्थानमा लिग समाप्त गरेको छ ।

मुम्बई १३ खेलमा ६ मा जित र ७ मा हार सहित १२ अंकका साथ छैटौं स्थानमा छ । राजस्थान रोयल्स १४ खेलमा ५ मा जित र ९ मा हार सहित १० अंकका सातौं स्थानमा छ । सनराइजर्स हैदराबाद १३ खेलमा १० मा हार र ३ मा जित सहित ६ अंकका साथ पुछारमा छ ।