काठमाडौं (हाम्रो खेलकुद) – युवा ब्याटर रोहित कुमार पौडेलले एभरेष्ट प्रिमियर लिग (इपिएल) को दोस्रो क्वालिफायर खेलमा भैरहवा ग्ल्याडियटर्सबाट पोखरा राइनोजविरुद्ध ओपनिङ गरेका छन् । टियु क्रिकेट मैदानमा टस हारेर ब्याटिङको निम्तो पाएको भैरहवाले ओपनिङमा रोहित कुमार पौडेल र प्रदीप ऐरीलाई ओपनिङ पठाएको छ ।

बंगलादेशका ओपनर तमिम इकबाल एलिमिनेटर खेलमा काठमाडौं किंग्स इलेभेनविरुद्ध घाइते भएपछि भैरहवाले रोहितलाई ओपनिङ पठाएको छ । रोहितले नेपाली सिनियर टोलीबाट मध्यक्रममा ब्याटिङ गर्दै आएका छन् । ओमान भ्रमणमा रोहितले उत्कृष्ट प्रदर्शन गरेका थिए ।

पोखराले आजको खेलमा टोलीमा दुई परिवर्तन गरेको छ । स्पिनर सुशान भारी र सुनिल धमलालाई पोखराले बेन्चमा राखेको छ । युवा ओपनर विपिन रावल र रित गौतमलाई आजको खेलमा प्लेइङ ११ मा मौका दिएको छ । पहिलो क्वालिफायरमा कमजोर ब्याटिङका कारण टोलीमा दुई परिवर्तन गरेको हो ।

भैरहवाले टोलीमा दुई परिवर्तन गरेको छ । तीव्र गतिका बलर कृष्ण कार्कीको स्थानमा स्पिनर भुवन कार्कीलाई मौका पाएका छन् । वंगलादेशका ओपनर तमिम इकबाल पनि टोलीमा छैनन् । चोटका कारण एलिमिनेटर खेलमा उनी टोली दोस्रो इनिङमा फिल्डिङ गरेका थिएनन् । उनको स्थानमा शार्विन मुनिआन्दीलई मौका दिएको छ । मलेसिया शार्विनले इपिएलमा डेब्यू खेल खेलेका छन् ।

भैरहवा ग्ल्याडियटर्सले एलिमिनेटर खेलमा काठमाडौं किंग्स इलेभेनलाई १६ रनले पराजित गर्दै क्वालिफायरमा स्थान बनाएको थियो । पोखरा राइनोज पहिलो क्वालिफायरमा चितवन टाइगर्ससँग ९ विकेटले पराजित भएको थियो । आजको विजेताले फाइनलमा चितवन टाइगर्ससँग खेल्नेछ ।