काठमाडौं (हाम्रो खेलकुद) – भैरहवा ग्ल्याडियटर्सका कप्तान शरद भेषावकरलाई एभरेष्ट प्रिमियर लिग (इपिएल) चौथो संस्करणको एलिमिनेटर खेलमा २० प्रतिशत जरिवना लागेको छ । बुधबार भएको एलिमिनेटर खेलमा काठमाडौं किंग्स इलेभेनविरुद्ध कप्तानी गर्ने क्रममा एक ओभर स्वलो रेटका कारण कप्तान शरदको २० प्रतिशत म्याच फि काटिने भएको छ ।

शरद बाहेक भैरहवाबाट काठमाडौंविरुद्ध खेलेका बाँकी १० खेलाडीको भने १० प्रतिशत म्याच फि काटिएको छ । एकै सिजनमा दोस्रो पटक स्वलो ओभरको कारण शरद र भैरहवा अन्य खेलाडीलाई डबल फाइन सहित जरिवना लागेको हो । भैरहवाले १६ रनले पराजित गर्दै क्वालिफायरमा पुगेको छ । जारी इपिएलमा शरद दोस्रो पटक जरिवनामा परेका हुन् । लिगको खेलमा चितवन टाइगर्सविरुद्ध स्वलो ओभर रेटका कारण शरदलाई १० प्रतिशत म्याच फि जरिवना लागेको थियो । अन्य खेलाडीलाई उक्त खेलमा २ प्रतिशत जरिवना लागेको थियो ।

स्वलो ओभर रेटको कारण यसअघि लिगमा इपिएलमा पोखरा राइनोजका कप्तान विनोद भण्डारी, ललितपुर प्याट्रियट्सका कुशल भुर्तेल र काठमाडौं किंग्स इलेभेनका कप्तान सन्दीप लामिछानेलाई पनि जरिवना लागेको थियो । नियम अनुसार एक इनिङ ९० मिनेट भित्रमा सकि सकेको हुनुपर्छ । त्यो भन्दा बढी समय लागेको खण्डमा जरिवना लाग्ने गर्दछ । जसमा खेलाडी घाइते भएको, ब्याटर, छक्का बाहिर गएको वा अन्य कुनै कारण भएमा भने उक्त समय इनिङमा भने जोडिदैन ।

फाइनल प्रवेशको लागि भैरहवाले बिहीबार दोस्रो क्वालिफायरमा पोखरा राइनोजसँग खेल्नेछ । चितवन टाइगर्सले पहिलो क्वालिफायरमा पोखरा राइनोजलाई ९ विकेटले पराजित गर्दै फाइनलमा स्थान पक्का गरि सकेको छ । फाइनल शनिबार हुने छ । विजेताले ५० लाख र उपविजेताले १५ लाख प्राप्त गर्नेछन् ।

काठमाडौंविरुद्ध खेलेको भैरहवा प्लेइङ ११

शरद भेषावकर (कप्तान) रोहित कुमार पौडेल (उपकप्तान), आरिफ शेख, कुशल मल्ल, अभिनाश बोहरा, प्रदीप ऐरी, उपुर थंरगा, तमिम इकबाल, धाम्मिका प्रसाद, दुर्गेश गुप्ता र कृष्ण कार्की ।