एजेन्सी – तीन पटकको च्याम्पियन चेन्नई सुपर किंग्समाथि ३ विकेटको रोमान्चक जित निकाल्दै दिल्ली क्यापिटल्स इन्डियन प्रिमियर लिग (आइपिएल) को शीर्षस्थानमा उक्लिएको छ । योसँगै दिल्लीको शीर्ष दुईमा रहँदै प्लेअफ खेल्ने सम्भावना बलियो बनेको छ ।

जितको लागि १ सय ३७ रनको विजयी लक्ष्य पछ्याएको दिल्लीले १९.४ ओभरमा ७ विकेटको क्षतिमा पूरा गर्यो । ओपनर शिखर धवनले ३५ बलमा ३ चौका र २ छक्का सहित सर्वाधिक ३९ रनको योगदान दिए । दिल्लीलाई अन्तिम ओभरमा जितको लागि ६ बलमा ६ रन चाहिँएको थियो । तीन बलमा दुई रन चाहिँएको अवस्थामा चौथो बलमा कागिसो रबाडाले ड्वेन ब्राभोलाई चौका प्रहार गर्दै जित पक्का गराए ।

दिल्लीको जितमा तल्लोक्रममा ब्याटिङ गर्दै शिम्रन हेटमायरले १८ बलमा २ चौका र १ छक्का सहित २८ रनको महत्वपूर्ण अविजित इनिङ खेले । ओपनर पृथ्वी शा र रिपल पटेल १८–१८ रनमा आउट भए । ऋषभ पन्त १५, श्रेयस ऐर र रविचन्द्रन आश्विन २–२ र अक्षर पटेल ५ रनमा आउट भए । चेन्नईका रविन्द्र जडेजा र शार्दूल ठाकुरले २–२ विकेट लिए । दीपक चाहर, ड्वेन ब्राभो र जोश हेजलवुडले १–१ विकेट लिए ।

त्यसअघि दुबईमा टस हारेर ब्याटिङ थालेको चेन्नईले निर्धारित २० ओभरमा ५ विकेट गुमाउँदै १ सय ३६ रन बनाएको थियो । चेन्नईका अम्बाती रायुडूले ४३ बलमा ५ चौका र २ छक्का सहित सर्वाधिक ५५ रनको योगदान दिए । कप्तान महेन्द्रसिंह धोनी १८, ऋतुरजा गायकवाड १३, फाफ डु प्लेसिस १०, रोविन उथप्पा १९ र मोईन अली ५ रनमा आउट भए । दिल्लीका अक्षर पटेलले ४ ओभरमा १८ रन खर्चेर २ विकेट लिए । एनरिच नोर्किया, आवेश खान र रविचन्द्रन आश्विनले १–१ विकेट लिए ।

यो जितसँगै दिल्लीले लिगमा शीर्ष दुईमा रहँदै क्वालिफायर खेल्ने सम्भावना उच्च बनेको छ । दिल्लीले अन्तिम खेलमा बेंगलोरलाई पराजित गरेमा शीर्षस्थानमा रहेर क्वालिफायर खेल्ने छ । १६ अंक भएको बेंगलोरले दुई खेल खेल्न बाँकी छ । बंगलोर दुबै खेलमा विजयी भएपनि नेटरनरेटको आधारमा दिल्ली अघि रहनसक्छ । चेन्नई अन्तिम खेलमा पराजित भएमा पनि दिल्ली क्वालिफायरमा स्थान पक्क गराउने छ । दिल्लीको अंक तालिकामा २० अंक छ । उसलाई अंक गणीतिय रुपमा चेन्नई र बेंगलोरले मात्र भेट्टाउन सक्छन् । दोस्रो स्थानमा रहेको चेन्नईले एक खेल खेल्न बाँकी हुँदा १८ अंक छ । दिल्लीले शुक्रबार बेंगलोरसँग खेल्नेछ ।

दिल्ली, बेंगलोर र चेन्नई प्लेअफमा पुगि सकेका छन् । कोलकाता, राजस्थान, पन्जाब र मुम्बई मध्य एक टोलीले प्लेअफमा स्थान बनाउनेछन् । शीर्ष दुई टोलीले क्वालिफायर खेल्दा तेस्रो र चौथो स्थानको टोलीले एलिमिनेटर खेल्नेछन् ।

अंक तालिका

दिल्ली क्यापिटल्स १३ खेलमा १० मा जित र ३ मा हार सहित २० अंकका साथ शीर्षस्थानमा छ । चेन्नई सुपर किंग्स १३ खेलमा ९ जित र ४ मा हार सहित १८ अंकका साथ दोस्रो स्थानमा छ । रोयल च्यालेन्जर्स बेंगलोर १२ खेलमा ८ मा जित र ४ मा हार सहित १६ अंकका साथ तेस्रो स्थानमा छ । कोलकाता १३ खेलमा ६ जित र ७ मा हार सहित १२ अंकका साथ चौथो स्थानमा छ ।

पन्जाब १३ खेलमा ५ मा जित र ८ मा हार सहित १० अंकका साथ पाँचौं स्थानमा छ । राजस्थान रोयल्स १२ खेलमा ५ मा जित र ७ मा हार सहित १० अंकका छैटौं स्थानमा छ । मुम्बई १२ खेलमा ५ मा जित र ७ मा हार सहित १० अंक जोड्दै सातौ स्थानमा छ । सनराइजर्स हैदराबाद १२ खेलमा १० मा हार र २ मा जित सहित ४ अंकका साथ पुछारमा छ ।