एजेन्सी – भारतीय क्रिकेट टोलीका सर्वाधिक सफल कप्तान महेन्द्रसिंह धोनीले युवा स्टार यशस्वी जैसवालको ब्याटमा हस्ताक्षर गरेका छन् । शनिबार राती इन्डियन प्रिमियर लिग (आइपिएल) मा राजस्थान रोयल्सले चेन्नई सुपर किंग्सलाई ७ विकेटले पराजित गर्न जैसवालले उत्कृष्ट प्रदर्शन गरेपछि धोनीले ब्याटमा हस्ताक्षर गरेका हुन् ।

शनिबार राती राजस्थानले १ सय ९० रनको विजयी लक्ष्य १७.३ ओभरमा ३ विकेट गुमाउँदै पूरा गरेको थियो । जैसवालले आइपिएल करिअरको पहिलो अर्धशतक १९ बलमै प्रहार गरेका थिए । जैसवालले २१ बलमा ६ चौका र ३ छक्का सहित ५० रनको उत्कृष्ट सुरुवात दिएपछि राजस्थानले सहज जित हात पारेको थियो । शिवम दुबे ४२ बलमा ४ चौका र ४ छक्का सहित ६४ रनमा अविजित थिए ।

त्यसअघि चेन्नईले निर्धारित २० ओभरमा ४ विकेट गुमाउँदै १ सय ८९ रन बनाएको थियो । युवा ब्याटर ऋतुराज गायकवाडले ६० बलमा ९ चौका र ५ छक्का सहित सहित १ सय १ रनको उत्कृष्ट इनिङ खेलेपछि चेन्नईले बलियो योगफल तयार पारेको थियो । धोनी जैसवालका आदर्श खेलाडी हुन् । गतवर्ष आइपिएलमा चेन्नईसँग पहिलो खेलमा जैसवालले पहिलो पटक भेट्दा धोनीलाई नमस्ते गरेको तस्विरले सामाजिक सञ्जालमा राम्रो चर्चा पाएको थियो ।

जैसवालले आइपिएलमा गतवर्ष चेन्नईविरुद्धनै डेब्यू गरेका थिए । १९ वर्षिय बायाँ हाते ओपनर जैसवाललाई भारतीय क्रिकेट टोलीको भविष्य मानिन्छ । जैसवालले भारतको उमेर समूह र घरेलु क्रिकेट दुबैमा सानदार प्रदर्शन गर्दै आएका छन् । राजस्थानलाई प्लेअफको सम्भावना कायमै राख्न उक्त खेल जित्नैपर्ने दबाब थियो । गत वैशाखमा इंग्ल्यान्डका विकेटकिपर ब्याटर जस बटलरले जैसवालबाट प्रभावित हुँदै आफूले खेल्ने ब्याटनै उपहार दिएका थिए ।

आइपिएलमा धेरैले जैसवाललाई शिखर धवनको उत्तराधिकारीको रुपमा हेर्दै आएका छन् । गतवर्ष अक्सनमा राजस्थानले जैसवाललाई २ करोड ४० लाख रुपैयाँमा अनुबन्ध गरेको थियो । उनले गतवर्ष दक्षिण अफ्रिकामा भएको यु१९ विश्वकपमा ६ खेलमा १ शतक र ४ अर्ध शतक सहित कुल ४ सय रनका साथ शीर्ष स्थानमा रहँदै सर्वोउत्कृष्ट खेलाडी चुनिएका थिए ।

उनले पाकिस्तानविरुद्ध १ सय १३ बलमा ८ चौका र ४ छक्का सहित १ सय ५ रनमा अविजित रहँदै १० विकेटको जित दिलाएका थिए । उनले दुई वर्षअघि लिष्ट ए मा २ सय ३ रन बनाउँदै कम उमेरमा दोहोरो शतक प्रहार गर्ने कीर्तिमान कायम गरेका थिए ।

जैसवालको संघर्षपूर्ण जीवनीबारे यसअघि लेखिएको लेख : यशश्वी जैश्वाल : पानीपुरी ठेलादेखि आईपीएल करोडपति मेलासम्म