काठमाडौं (हाम्रो खेलकुद) – नेपाली क्रिकेट टोलीका पूर्व तीव्र गतिका बलर महबबु आलमलाई एभरेष्ट प्रिमियर लिग (इपिएल) ले सम्मान गरेको छ । शनिबार एक कार्यक्रमकाबीच महबुबलाई ५१ हजार नगद रुपैयाँ सहित इपिएलले सम्मान गरेको हो ।

महबुबलाई नेपाल क्रिकेट संघ (क्यान) का कोषध्यक्ष रोशनकुमार सिंहले ५१ हजार नगद सहित सम्मान गरेका थिए । नेपाली क्रिकेटलाई उनले दिएको योगदानको कदर गर्दै सम्मान गरेको हो । महबुबले अन्तर्राष्ट्रिय क्रिकेटबाट सन्न्यासको घोषणा गरि सकेका छन् ।

झण्डै दुई दशक नेपाली टोलीबाट खेलेका महबुबलाई राष्ट्रिय सम्मानका साथ बिदाइ गर्नुपर्ने माग प्रदेश २ ले दुई महिना अघि जनाएको थियो । २००८ मा मोजाम्बिकविरुद्ध मेहबुबले ७.५ ओभरमा १ मेडन सहित १२ रन खर्चेर १० विकेट लिदै गिनिज बुकमा नेपाल लेखाएका थिए । उनी सिमित ओभरको अन्तर्राष्ट्रिय खेलमा १० विकेट लिने विश्वको एक्लो खेलाडी हुन् ।

महबुबले नेपालबाट सन् २००० मा जापानविरुद्ध डेब्यू गरेका थिए । टि२० क्रिकेटमा उनले २०११ मा साउदी अरेबियाविरुद्ध ४१ बलमा ५ चौका र ६ छक्का सहित ८८ रनको उत्कृष्ट इनिङ खेलेका थिए । जुन नेपाली क्रिकेटबाट टि२० खेलमा बनेको सर्वाधिक रन हो । तर २०१९ मा टि२० आईमा पारसले सिंगापुरविरुद्ध १ सय ५ र ज्ञानेन्द्र मल्लले भुटानविरुद्ध १ सय ६ रन बनाएका थिए ।

महबुब घरेलु क्रिकेटमा दोहोरो शतक प्रहार गर्ने पहिलो र एकै खेलमा सर्वाधिक रन बनाउने ब्याट्सम्यान समेत हुन् । महबुबले २००५ मा वीरेन्द्र स्मृति क्षेत्रिय छनोटमा सप्तरीबाट उदयपूरविरुद्ध १ सय २३ बलमा २६ चौका र १८ छक्का सहित २ सय ५६ रनको विष्फोटक इनिङ खेलेका थिए ।

उनीपछि गतवर्षमात्र प्रधानमन्त्री कप प्रतियोगिता अन्तर्गत बागमती प्रदेश छनोटमा आदील खानले ललितपुरबाट त्रिभुवन विश्वविद्यालयबाट १ सय २१ बलमा १५ चौका र १५ छक्का सहित २ सय १ रनको दोहोरो शतकीय इनिङ खेलेका थिए । प्रथम श्रेणीको खेलमा महबुबले २००४ मा मलेसियाविरुद्ध डेब्यू गरेका थिए । लिष्ट ए मा २०१५ मा पपुवा न्युगिनीविरुद्ध डेब्यू गरेका थिए । मेहबुबले नेपालबाट अन्तिम पटक २०१७ मार्चमा बंगलादेशमा सम्पन्न एसिसी इमर्जिङ टिम्स एसिया कप खेलेका थिए ।