काठमाडौं (हाम्रो खेलकुद) – लगातार चौथो हारसँगै विराटनगर वारियर्स एभरेष्ट प्रिमियर लिग (इपिएल) चौथो संस्करणको लिगबाटै बाहिरिएको छ । शनिबार पोखरा राइनोजसँग ७ विकेटले पराजित हुँदै विराटनगर लिगबाटै बाहिरिने पहिलो टोली बनेको छ । असेला गुणरत्नेले कप्तान करण केसीलाई छक्का प्रहार गर्दै जित पक्का गराए ।

जितको लागि १ सय ७३ रनको विजयी लक्ष्य पछ्याएको पोखराले १७.४ ओभरमा ३ विकेट गुमाउँदै पूरा गर्यो । पोखराका असेला गुणरत्ने २४ बलमा ४ चौका र ३ छक्का सहित ५० रनमा अविजित रहे । ओपनर रिचार्ड लेभी २६ बलमा ४ चौका र ३ छक्का सहित ४७ रनमा क्याच आउट भए ।

बायाँ हाते तीव्र गतिका बलर प्रतिश जि.सी. ले दोस्रो ओभरको दोस्रो बलमा रित गौतमलाई ५ रनमा फस्ट स्लिपमा हरि चौहानबाट क्याच आउट गराएका थिए । स्पिनर सिकन्द राजाको बलामा ठूलो सट खेलेका रचार्ड लेभी एज लागेर चौहानबाट क्याच आउट भएपछि अर्धशतक बनाउन चुकेका थिए । साहन आर्चाचिगेले ३६ बलमा ४ चौका र १ छक्का सहित ४३ रनमा क्याच आउट भए । विनोद भण्डारी १६ बलमा १५ रनमा अविजित रहे । विराटनगरका प्रतिश जि.सी, सिकन्द राजा र हरि चौहानले १–१ विकेट लिए ।

त्यसअघि टियु क्रिकेट मैदानमा टस हारेर ब्याटिङको निम्तो पाएको विराटनगरले निर्धारित २० ओभरमा ५ विकेट गुमाउँदै १ सय ७२ रन बनाएको थियो । विराटनगरका युवा ओपनर आसिफ शेख सर्वाधिक ४४ रन बनाए । सन्दीप रजाली २२ बलमा २ चौका र १ छक्का सहित २८ रनमा अविजित रहे । कप्तान करण केसीले तल्लोक्रममा ९ बलमा ३ छक्का सहित २४ रनमा अविजित रहे ।

ओपनर चन्द्रपाउल हेमराज चौथो खेलमा पनि चल्न सकेनन् । तीव्र गतिका बलर विक्रम सोबले पहिलो ओभरको अन्तिम बलमा हेमराज २ रनमा बोल्ड आउट हुन पुगेका थिए । दीलशान मुनाविरा ११ बलमा २ चौका र १ छक्का सहित १६ रनमा क्याच आउट भए । उनी सोबको पाँचौं ओभरको अन्तिम बलमा विकेटकिपर बिनोद भण्डारीबाट क्याच आउट हुन पुगेका थिए ।

युवा विकेटकिपर आसिफ शेख ११ औं ओभरको पाँचौं बलमा ४४ रनमा क्याच आउट भए । युवा बलर बलर विवेक यादवको बलमा ठूलो सट खेलेका आसिफ डिप मिडविकेटमा समातिन पुगेका थिए । आसिफले ३३ बलमा ६ चौका प्रहार गरे । सिकन्दर राजा २० बलमा १ चौका र ३ छक्का सहित २९ रनमा आउट भए । अनिल शाहले १९ बलमा १२ रन बनाए । पोखरा विक्रम सोबले सर्वाधिक २ विकेट लिए । विवेक यादव, नन्दन यादव र साहन अर्चाचिगेले एक एक विकेट लिए ।

विराटनगर पहिलो खेलमा चितवन टाइगर्ससँग २ विकेट, भैरहवा ग्ल्याडियटर्ससँग ६ विकेट र ललितपुरसँग ३७ रनले पराजित भएको थियो । पोखराले पहिलो खेल भैहरवासँग वर्षाको कारण अंक बाँडेको थियो । दोस्रो खेलमा पोखराले ललितपुरलाई ९ विकेटले पराजित गरेको थियो । तेस्रो खेलमा चितवनसँग ९ विकेटले पराजित भएको थियो । विराटनगरले आइतबार काठमाडौंसँग खेल्ने छ । पोखराले सोमबार काठमाडौंसँग खेल्ने छ ।

अंक तालिका

चितवन ३ खेलमा ३ मानै जितका साथ ६ अंकका साथ शीर्षस्थानमा छ । पोखरा ४ खेलमा २ जित र १ मा हार सहित ५ अंकका साथ दोस्रो स्थानमा छ । भैरहवा ३ खेलमा १ मा जित र दुई खेलमा अंक बाड्ँदै ४ अंकका साथ तेस्रो स्थानमा छ ।

ललितपुर ४ खेलमा १ मा जित, २ मा हार सहित ३ अंक जोड्दै बाँड्दै चौथो स्थानमा छ । काठमाडौं २ खेलमा १ मा जित र १ मा हार सहित २ अंकका साथ पाँचौं स्थानमा छ । विराटनगर वारियर्स ४ खेलमा अंक विहिन हुँदै पुछारमा छ ।