काठमाडौं (हाम्रो खेलकुद) – विराटनगर वारियर्सका शीर्षक्रममा ब्याटर दीलशान मुनाविराले एभरेष्ट प्रिमियर लिग (इपिएल) मा ललितपुर प्याट्रियटर्सविरुद्ध अर्धशतक प्रहार गरेका छन् । जितको लागि २ सय २७ रनको विशाल विजयी लक्ष्य पछ्याएको विराटनगरले १४ ओभरमा २ विकेट गुमाउँद १ सय ४८ रन बनाएको छ ।

दीलशान मुनाविरा ३३ बलमा अर्धशतक प्रहार गरे । दीलशान ३४ बलमा ५ चौका र ३ छक्का सहित ५१ रनमा अविजित छन् । सिकन्दर राजा १० बलमा २ चौका र २ छक्का सहित २३ रनमा अविजित छन् ।

ओपनर चन्द्रपाउल हेमराज र आसिफ शेखले ३.५ ओभरमा ५० रनको साझेदारी गर्दै राम्रो सुरुवात दिलाएका थिए । आजमतुल्लाह ओमरजाईले बोल्ड गनुअघि हेमराजले १३ बलमा ४ चौका र १ छक्का सहित २८ रन बनाए । आसिफ शेख ३० बलमा ६ चौका सहित ३७ रनमा क्याच आउट हुन पुगेका थिए ।

त्यसअघि टियु क्रिकेट मैदानमा टस हारेर ब्याटिङको निम्तो पाएको ललितपुरले निर्धारित २० ओभरमा ५ विकेट गुमाउँदै २ सय २६ रन बनाएको थियो । यो इपिएल इतिहासकै सर्वाधिक ठूलो योगफल हो । यसअघि २०१८ मा भैरहवा ग्ल्याडियटर्सविरुद्ध पोखरा राइनोजले २ सय १५ रन बनाएको थियो । भैरहवाले उक्त लक्ष्य १९।४ ओभरमा ६ विकेट गुमाउँदै पूरा गरेको थियो ।

ललितपुरका आजमतुल्लाह ओमरजाइ २४ बलमा ७ छक्का ५८ सहित रनमा अविजित रहे । उनले २१ बलमा अर्धशतक पूरा गरेका थिए । ओपनर सान्दुन विराक्कोडीले ४३ बलमा १० चौका र ३ छक्का सहित सर्वाधिक ७३ रनको योगदान दिए । कप्तान कशुल भुर्तेल १७ बलमा ४ चौका र २ छक्का सहित ३२ रनमा आउट भए ।