एजेन्सी – चेन्नई सुपर किंग्सले सनराइजर्स हैदराबादलाई ६ विकेटले पराजित गर्दै इन्डियन प्रिमियर लिग (आइपिएल) २०२१ मा को प्लेअफमा पुगेको छ । चेन्नई शीर्षस्थानमा रहँदै आइपिएल २०२१ प्लेअफमा पुग्ने पहिलो टोली बनेको छ । चेन्नई खेलेका १२ संस्करणको आइपिएल मध्य ११ औं पटक प्लेअफमा पुगेको हो । चेन्नईका कप्तान महेन्द्रसिंह धोनीले छक्का प्रहार गर्दै तीन खेल अगावै प्लेअफमा स्थान बनाएका छन् । यो हारसँगै सनराइजर्स हैदराबादको शीर्ष चारमा रहँदै प्लेअफ खेल्ने सम्भावना सकिएको छ ।

जितको लागि १ सय ३५ रनको विजयी लक्ष्य पछ्याएको चेन्नईले १९.४ ओभरमा ४ विकेट गुमाउँदै पूरा गर्यो । चेन्नईका युवा ओपनर ऋतुराज गायकवाडले ३८ बलमा ४ चौका र २ छक्का सहित सर्वाधिक ४५ रनको योगदान दिए । फाफ डु प्लेसिस ३६ बलमा ३ चौका र २ छक्का सहित ४१ रनमा आउट भए । कप्तान महेन्द्रसिंह धोनी ११ बलमा १ चौका र १ छक्का सहित १४ रनमा अविजित रहे । अम्बाती रायुडू १३ बलमा १ चौका र १ छक्का सहित १७ रनमा अविजित रहे ।

चेन्नईलाई ओपनर फाफ डु प्लेसिस र ऋतुराजले १०.१ ओभरमा ७५ रनको साझेदारी गर्दै उत्कृष्ट सुरुवात दिलाएका थिए । मोईन अली १७ र सुरेश रैना २ रनमा आउट भए । हैदराबादका जेसन होल्डरले ४ ओभरमा २७ रन खर्चेर ३ विकेट लिए । राशिद खानले १ विकेट लिए ।

त्यसअघि शारजाहमा टस हारेर ब्याटिङको निम्तो पाएको हैदराबादले निर्धारित २० ओभरमा ७ विकेट गुमाउँदै १ सय ३४ रन बनाएको थियो । हैदराबादका विकेटकिपर तथा ओपनर ऋद्धिमान शाहले ४६ बलमा १ चौका र २ छक्का सहित सर्वाधिक ४४ रनको योगदान दिए ।हैदराबादका अन्य कुनैपनि ब्याटरले राम्रो प्रदर्शन गर्न सकेनन् ।

ओपनर जेसन रोय २, केन विलियम्सन ११, प्रियम गर्ग ७, अभिषेक शर्मा र अब्दुल सामद १८–१८ रनमा आउट भए । राशिद खान १३ बलमा २ चौका सहित १७ रनमा अविजित रहे । प्रमुख ब्याटर डेविड वार्नर खराब लयको कारण टोलीमा थिएनन् । चेन्नईका तीव्र गतिका बलर जोश हेजलवुडले ४ ओभरमा २४ रन खर्चेर सर्वाधिक ३ विकेट लिए । मध्यगतिका बलर ड्वेन ब्राभोले ४ ओभरमा १७ रन खर्चेर २ विकेट लिए । शार्दूल ठाकुर र रविन्द्र जडेजाको नाममा १–१ विकेट रह्यो ।

चेन्नई आइपिएल इतिहासमा गतवर्ष पहिलो पटक लिग चरणबाटै बाहिरिएको थियो । २०२० बाहेक अन्य सबै संस्करणमा चेन्नईले सहजै प्लेअफमा स्थान बनाएको थियो । चेन्नईले तीन आइपिएल उपाधि जितेको छ । चेन्नईले शनिबार आबूधाबीमा खेल्नेछ । हैदराबादले आइतबार कोलकाता नाइट राइडर्ससँग खेल्ने छ ।

अंक तालिका

चेन्नई सुपर किंग्स ११ खेलमा ९ जित र २ मा हार सहित १८ अंकका साथ शीर्षस्थानमा रहँदै प्लेअफमा स्थान बनाएको छ । चेन्नईको शीर्ष दुईमा रहेर सिधैं क्वालिफायर खेल्ने सम्भावना छ । दिल्ली क्यापिटल्स ११ खेलमा ८ मा जित र ३ मा हार सहित १६ अंकका साथ दोस्रो स्थानमा छ । दिल्लीको प्लेअफ औपचारिकता बाँकी छ ।

रोयल च्यालेन्जर्स बेंगलोर ११ खेलमा ७ मा जित र ४ मा हार सहित १४ अंकका साथ तेस्रो स्थानमा छ । बेंगलोरको पनि प्लेअफ सम्भावना बलियो छ । कोलकाता ११ खेलमा ५ जित र ६ मा हार सहित १० अंकका साथ चौथो स्थानमा छ । मुम्बई इन्डियन्स ११ खेलमा ५ मा जित र ६ मा हार सहित १० अंक बटुल्दै पाँचौं स्थानमा छ ।

पन्जाब ११ खेलमा ४ मा जित र ७ मा हार सहित ८ अंकका साथ छैटौं स्थानमा । राजस्थान रोयल्स ११ खेलमा ४ मा जित र ७ मा हार सहित सहित ८ अंकका साथ सातौ स्थानमा छ । राजस्थान र पन्जाबले बाँकी सबै खेलमा जित निकाल्नुपर्ने हुन्छ । जितले मात्र पुग्ने छैन अन्य टोलीको नतिजामा निर्भर रहने छ । सनराइजर्स हैदराबाद ११ खेलमा ९ मा हार र २ मा जित सहित ४ अंकका साथ पुछारमा छ । हैदराबादको अघिल्लो चरणको सम्भावना सकिएको छ ।