काठमाडौं (हाम्रो खेलकुद) – कप्तान पारस खड्का सहित नेपाली ८ राष्ट्रिय क्रिकेट खेलाडी सम्मिलित नेपाली राइनोज समूह विजेता बन्दै अमेरिकामा जारी टु एक्स युएसए कप क्रिकेट प्रतियोगिताको सेमिफाइनल पुगेको छ । वेस्ट इन्डिजका टोलीका पूर्व खेलाडी शन फिडंलेको आक्रामक शतकीय इनिङको मद्दतले आज नेपाली राइनोजले समरसेट कभालियर्सलाई ४४ रनले हराउँदै लगातार तेस्रो जितपछि समूह एको विजेताका रुपमा अघि बढेको हो । अब नेपाली राइनोजले फाइनल प्रवेशका लागि समूह ‘बी’ को उपविजेता अन्डरडग्सको सामना गर्नेछ ।

टस जितेर पहिले ब्याटिङ रोजेको नेपाली राइनोजले ले ७ विकेटको क्षेतिमा २ सय रन बनाएको थियो । जवाफमा समरसेटले ८ विकेट गुमाएर १ सय ५६ रन मात्र बनाउन सक्यो । नेपालले १० ओभरको पहिलो इनिङमा ३ विकेट गुमाएर ७१ रन बनाएको थियो । समरटेसले २ विकेटको क्षेतिमा ८० रन जोड्दै पहिलो इनिङमा ९ रनको अग्रता लिएको थियो । दोस्रो इनिङमा दमदार ब्याटिङ गरेको नेपाली राइनोजले थप ४ विकेट गुमाएर १ सय २९ रन बनायो र १ सय २० रनको अग्रता लिन सफल भयो । १ सय २१ रनको लक्ष्य पछ्याएको समसेटले थप ६ विकेट गुमाउँदै ७५ रन मात्र बनाउन सक्यो । नेपाली राइनोजका लागि फिडंलेले विस्फोटक व्याटिङ गर्दै ४६ बलमा १ सय १३ रन बनाए । उनले १२ छक्का र ३ चौका प्रहार गरेका थिए ।
नेपाली राइनोजका लागि अघिल्लो दुई खेलमा पनि राम्रो प्रदर्शन गरेका ओपनर सुवास खकुरेलले २२ रन, शरष भेषावकरले ३९, सोमपाल कामिले २१ रन बनाए । कप्तान पारस खाता खोल्न नपाउँदै आउट भए भने ज्ञानेन्द्र मल्ल १ रनमा आउट भए । सिद्धान्त लोहनीले पनि शून्यमै आउट भए । शतक बनाएका फिडंले र बसन्त रेग्मीले समान २ तथा पारस, सोमपाल र शदरले समान १ विकेट लिए ।
समरसेटका लागि वेस्ट इन्डिजका पूर्व खेलाडी जेभियर मार्शलले ५८, बंगलादेशका पूर्व खेलाडी तपश वैश्य र शेमरोय बेरिगंटनले समान २१ रन बनाए । पहिलो खेलमा एमएसएम इङ्ल्यान्डलाई ७ विकेटले हराएको नेपाली राइनोजले दोस्रो खेलमा युएई फाल्कोन्समाथि ५ विकेटको जित हासिल गरेको थियो । टु एक्स युएसएको विजेता टोलीले ६० हजार अमेरिकी डलरका साथै २० अमेरिकी डलर बराबरको मित्सुबिसी कार पुरस्कार वापत प्राप्त गर्नेछ ।