एजेन्सी – इन्डियन प्रिमियर लिग (आइपिएल) को ४२ औं खेलमा मुम्बई इन्डियन्सले पन्जाब किंग्सलाई ६ विकेटले पराजित गरेको छ । यस सिजनको पाँचौं जित निकाल्दै मुम्बई अंक तालिका पाँचौं स्थानमा उक्लिएको छ ।

जितको लागि १ सय ३६ रनको विजयी लक्ष्य पछ्याएको मुम्बईले १९ ओभरमा ६ विकेट गुमाउँदै पूरा गर्यो । मुम्बईको जितमा हार्दिक पान्ड्याले ३० बलमा ४ चौका र २ छक्का सहित अविजित ४० रनको योगदान दिए । काइलन पोलार्डले ७ बलमा १ चौका र १ छक्का सहित १५ रनमा अविजित रहे । सौरभ तिवारी ३७ बलमा ३ चौका र २ छक्का सहित सर्वाधिक ४५ रन बनाए । कप्तान रोहित शर्मा ८, क्विन्टन डि कक २७ र सूर्यकुमार यादव शून्यमा आउट भए ।

पन्जाबका स्पिनर रवि बिश्रोईले ४ ओभरमा २५ रन खर्चेर २ विकेट लिए । मोहम्मद शामी र नाथन एलिसले १–१ विकेट लिए । त्यसअघि आबूधाबीमा टस हारेर ब्याटिङको निम्तो पाएको पन्जाबले निर्धारित २० ओभरमा ६ विकेट गुमाउँदै १ सय ३५ रन बनाएको थियो । पन्जाबका एडेन माक्ररमले २९ बलमा ६ चौका सहित सर्वाधिक ४२ रनको योगदान दिए । दीपह हुड्डा २६ बलमा १ चौका र १ छक्का सहित २८ रन जोडे । ओपनर तथा कप्तान लोकेश राहुल २१, मन्दीप सिंह १५, क्रिस गेल १ र निकोलस पुरन २ रनमा आउट भए । हरप्रीत ब्रार १४ र नाथन एलिस ६ रनमा अविजित रहे ।

मुम्बईका काइरन पोलार्डले १ ओभरमा ८ रन खर्चेर २ विकेट लिए । पोलार्डनै खेलमा प्लेयर अफ द म्याच चुनिए । जस्प्रित बुमराहले २, क्रुनाल पान्ड्या र राहुल चाहरले १–१ विकेट लिए । मुम्बईले अव शनिबार दिल्ली क्यापिटल्ससँग शारजाहमा खेल्नेछ । पन्जाबले शुक्रबार कोलकातामा दुबईसँग खेल्ने छ ।

अंक तालिका

चेन्नई सुपर किंग्स १० खेलमा ८ जित र २ मा हार सहित १६ अंक जोड्दै शीर्षस्थानमा छ । दिल्ली क्यापिटल्स ११ खेलमा ८ मा जित र ३ मा हार सहित १६ अंकका साथ दोस्रो छ । दिल्ली र चेन्नईको प्लेअफ लगभग निश्चित छ । औपचारिक मात्र बाँकी छ । आइपिएल इतिहासमा १६ अंक भएर पनि प्लेअफ नखेलेको रेकर्ड छैन । रोयल च्यालेन्जर्स बेंगलोर १० खेलमा ६ मा जित र ४ मा हार सहित १२ अंकका साथ तेस्रो स्थानमा छ । कोलकाता ११ खेलमा ५ जित र ६ मा हार सहित १० अंकका साथ चौथो स्थानमा छ । मुम्बई इन्डियन्स ११ खेलमा ५ मा जित र ६ मा हार सहित १० अंक बटुल्दै पाँचौ स्थानमा छ ।

पन्जाब ११ खेलमा ४ मा जित र ७ मा हार सहित ८ अंकका साथ छैटौं स्थानमा । राजस्थान रोयल्स १० खेलमा ६ मा हार र ४ मा जित सहित ८ अंकका साथ छैटौं स्थानमा छ । सनराइजर्स हैदराबाद १० खेलमा ८ मा हार र २ मा जित सहित ४ अंक जोड्दै पुछारमा छ ।