काठमाडौं (हाम्रो खेलकुद) – टियु अन्तर्राष्ट्रिय क्रिकेट मैदानमा शनिबारदेखि सुरु भएको एभरेष्ट प्रिमियर लिग (इपिएल) मा खेलाडीले प्रहार गरेको छक्का दर्शकले एक हातले क्याच गरे ५० हजार रुपैयाँ प्रदान गरिने भएको छ ।

प्रतियोगिताको पहिलो दिन ललितपुर प्याट्रीयट्स र काठमाडौं किंग्स ११ को खेलका दौरान नै आयोजकले यसबारे जानकारी दिएको थियो । मैदानमा खेलदौरान प्रहार गरिएको छक्का दर्शकले एक हातले समाउनु पर्ने नियम रहेको छ । शनिबार पहिलो दिन अनुमानित ५ हजार बढी दर्शक उपस्थित रहेको खेलमा छक्का प्रहार गर्दा बल पटक पटक दर्शकसम्म पनि पुगेको थियो । तर कसैले पनि बल समाउन सकेनन् ।

घरेलु क्रिकेटमा यो नयाँ प्रयोग भने होइन । यसअघि पनि फ्रेन्चाइज क्रिकेट र घरेलु प्रतियोगितामा यस किसिमका दर्शकलक्षित योजना आउने गरेको छ । यसअघि इपिएलको गत संस्करणमा पनि एक दर्शकले छक्का हानेको बल एक हातले क्याच गरेर ५० हजार रुपैयाँ जितेका थिए ।

यसपटक इपिएलमा दर्शक प्रवेशमा कुनै रोकतोक गरिएको छैन । यसअघि नेपाल र भारतबीच दशरथ रंगशालामा भएको पुरुष राष्ट्रिय टोलीको मैत्रीपूर्ण फुटबल तथा नेपाल र बंगलादेशबीच भएको महिला राष्ट्रिय टोलीको फुटबलमा एक तिहाइ दर्शकलाई मात्र प्रवेश दिइएको थियो । इपिएलका लिग भने प्रशासनबाट कुनै निर्देशन प्राप्त भएको छैन ।

यो पनि : ‘समर्थककै लागि क्रिकेट खेल्ने हो’ – बर्ल