काठमाडौं (हाम्रो खेलकुद) – नेपाली राष्ट्रिय क्रिकेट टोलीका विकेटकिपर विनोद भण्डारीले चौथो संस्करणको एभरेष्ट प्रिमियर लिग (इपिएल) मा पोखरा राइनोजको कप्तानी गर्ने भएका छन् । पोखराले काठमाडौंमा एक पत्रकार सम्मेलन गर्दै विनोदले कप्तानी गर्ने जनाएको छ ।

पछिल्लो सिजनमा पोखरा कप्तानी स्कटल्यान्डका काइल कोट्जरले गरेका थिए । तर उनी यस पटक टोलीमा छैनन् । स्कटल्यान्ड उनको कप्तानीमा अर्को महिना हुने टि२० विश्वकपको तयारीमा छ । विनोदले २०१६ को पहिलो संस्करणको इपिएलमा विनोदले सगरमाथा लिजेन्ड्सको कप्तानी गरेका थिए ।

विनोदको कप्तानीमा गत माघमा त्रिभुवन आर्मी क्लबले प्रधानमन्त्री कप एकदिवसिय क्रिकेट प्रतियोगिता उपाधि जितेको थियो । विनोदले घरेलु क्रिकेटमा लगातार त्रिभुवन आर्मी क्लबबाट कप्तानी गर्दै आएका छन् । २०१७ को धनगढी प्रिमियर लिग (डिपिएल) मा कन्चनपुर आइकोनीकको कप्तानी गरेका थिए । २०१८ विनोदले डिपिएलमा महेन्द्रनगर युनाइटेडको कप्तानी गरेका थिए । विनोदले टोलीमा युवा र अनुभवी खेलाडीको मिश्रण हुँदा टोली सन्तुलित रहेको बताए ।

नेपाली क्रिकेट टोलीका पूर्व प्रशिक्षक उमेश पटवाल पोखरा मुख्य प्रशिक्षकको रुपमा छन् । नेपाली क्रिकेट टोलीका पूर्वस्पिनर शक्ति गौचन बलिङ र फिल्डिङ प्रशिक्षकमा रिजन प्रजु छन् । पोखरा २०१८ को इपिएलमा पाँच खेलमा जित बिहिन हुँदै पुछारमा रहेर बाहिरिएको थियो ।

दक्षिण अफ्रिका ओपनर रिचर्ड लेभीले २०१८ मा पोखराबाट खेल्दै उत्कृष्ट प्रदर्शन गरेका थिए । तर अन्य खेलाडी चल्न नसक्दा पराजित हुन पुगेको थियो । इपिएल असोज ९ देखि २३ सम्म टियुमा हुने छ । इपिएल विजेताले ५० लाख र उप विजेताले १५ लाख रुपैयाँ प्राप्त गर्ने छन् । पोखराले पहिलो खेल भैरहवा ग्ल्याडियटर्ससँग सोमबार खेल्ने छ ।

पोखराको टोली :

विनोद भण्डारी (कप्तान), सुनिल धमला, रित गौतम, किशोर महतो, विक्रम सोब, विपिन खत्री, लोकेश बम, पृथु बास्कोटा, विवेक यादव, विपिन रावल, अर्जुन कुमाल, रविन्द्र जंग शाही, देव शाह, शोहिल कुँवर, रिचर्ड लेभी (दक्षिण अफ्रिका), केस्रिक विलियम्स (वेस्टइन्डिज), असेला गुणरत्ने(श्रीलंका) र सहान अर्चिगें (श्रीलंका) ।