काठमाडौं (हाम्रो खेलकुद) – नेपाली राष्ट्रिय क्रिकेट टोलीका कप्तान ज्ञानेन्द्र मल्लले ओमानविरुद्ध ऐतिहासिक जितपछि बोल्दै प्रशिक्षक डेभ ह्वाटमोरले छाडेकोमा दुख लागेको बताएका छन् ।

जितपछि पोस्ट म्याच कन्फरेन्समा बोल्दै ज्ञानेन्द्रले जितका साथ प्रशिक्षक डेभ ह्वाटमोरलाई बिदाइ गर्न पाएकोमा भने खुसी व्यक्त गरे । ‘प्रशिक्षक ह्वाटमोरको साथ नहुँदा पक्कै दुख लाग्छ । मलाई लाग्छ केहि चाडो नै छोडेर जानुभयो । म वहाँलाई शुभकामना दिन चाहन्छु । तर खुसी छु की हामीले जितको साथ बिदाइ गर्न पायौं,’ उनले भने ।

ज्ञानेन्द्रले बलिङ आक्रमणको पनि खुलेर प्रशंसा गरे । ‘ करण र सन्दीपले चाहिएको समयमा विकेट निकालेर टोलीलाई राम्रो स्थितिमा राखे । शरद एकदम अनुभवी खेलाडी हुन् । उनको टोलीमा पुनरागमन पनि राम्रो भयो,’ ज्ञानेन्द्रले भने ।

ज्ञानेन्द्रले ब्याटमा राम्रोसँग बल आएकोले पनि खुलेर खेल्न सकेको बताए । ‘बल एकदम राम्रोसँग ब्याटमा आइरहेको थियो । त्यसैले पनि विपक्षी बलरलाई दबाबमा राख्ने प्रयास गरेको थिएँ । त्यहि रणनीतिले जितसम्म पुग्न सकिन्छ भन्ने विश्वास थियो,’ उनले भने ।

ज्ञानेन्द्र र ओपनर आसिफ शेखको कीर्तिमानी साझेदारीमा नै नेपालले ओमानमाथि पहिलो ओडिआई जित दर्ता गर्न सफल भएको थियो । यो पनि : ओमानमाथि नेपालको ऐतिहासिक जित