काठमाडौं (हाम्रो खेलकुद) – साविक विजेता ललितपुर प्याट्रियट्सले चौथो संस्करणको एभरेष्ट प्रिमियर लिग (इपिएल) का लागि श्रीलंकाली विकेटकिपर ब्याट्सम्यान सन्दुन वीराक्कोडीलाई भित्र्याएको छ ।

२८ वर्षिय सन्दुनले श्रीलंकाबाट ३ ओडिआईमा ७३ रन बनाएका छन् । उनले २०१७ मा दक्षिण अफ्रिकाविरुद्ध ओडिआईमा डेब्यू गरेका थिए । उनले ६५ प्रथम श्रेणी, ७४ लिष्ट ए र ४२ टि२० खेल खेलेका छन् । उनले लिष्ट ए मा ३ शतक र १४ अर्धशतक सहित कुल २ हजार ७ सय रन बनाएका छन् । टि२० खेलमा उनले ५ सय ७४ रन बनाएका छन् ।

ललितपुरले विदेशी खेलाडीको रुपमा यसअघि भुटानका ब्याट्सम्यान मिक्यो दोर्जी, अफगानिस्तानका युवा अलराउन्डर आजमतुल्लाह ओमरजाई, इंग्ल्यान्डका एलेक्स ब्लेक र श्रीलंका ओशदा फर्नान्डाको नाम सार्वजनिक गरेको थियो । भिसाको कारण एलेक्स ब्लेक नआउने सम्भावना बढी छ ।

ललितपुरमा ज्ञानेन्द्र मल्ल, सन्दीप जोरा, राशिद खान, पवन सरार्फ, कुशल भुर्तेल, सोनु तामाङ, योगेन्द्रसिंह कार्की, कमल खत्री, रिजन ढकाल, बिभत्सु थापा, अरियो पौडेल, शंखर राना, नारायण जोशी, सुर्य तामाङ स्वदेशी खेलाडीको रुपमा खेलाडी छन् ।

इपिएल असोज ९ देखि २३ सम्म टियुमा हुने छ । इपिएल विजेताले ५० लाख र उप विजेताले १५ लाख रुपैयाँ प्राप्त गर्ने छन् । ललितपुरले २०१८ को फाइनलमा भैरहवा ग्ल्याडियसटर्सलाई १४ रनले पराजित गर्दै उपाधि जितेको थियो ।