एजेन्सी – भारतीय क्रिकेट टोलीका कप्तान विराट कोहलीले अर्को महिना हुने टि२० विश्वकपपछि टि२० शैलीबाट कप्तानी छाड्ने भएका छन् । कोहलीले सामाजिक सञ्जाल मार्फत टि२० विश्वकप पछि कप्तानी छाड्ने जनाएका छन् ।

विराटले टेस्ट र ओडिआईमा भने निरन्तर टोलीको कप्तानी गर्ने छन् । विराट कोहलीले प्रशिक्षक रवि शास्त्री, रोहित शर्मा र खेलाडीसँग छलफल गर्दै कप्तानी छोड्न लागेको बताएका छन् । विराटले २०१४ देखि टेस्टमा कप्तानी गर्दै आएका छन् । सिमित ओभरमा २०१७ देखि भारतीय टोलीको कप्तानी गर्दै आएका थिए । सन् २०१६ मा महेन्द्रसिंह धोनीले कप्तान छाडेपछि विराटले भारतीय टोलीको नेतृत्व गर्दै आएका थिए ।

कोहलीले टि२० विश्वकपपछि भारतीय टि२० शैलीको कप्तानी छाड्ने बिसिसिआईका अध्यक्ष सौरभ गांगुली र सचिव जय शाहलाई जानकारी दिइसकेको बताएका छन् । कोहलीले आफ्नो प्रदर्शन शतप्रतिशत दिन टि२० कप्तानी छोड्न लागेको जनाएका छन् । रोहितलाई टि२० कप्तानी दिन आवश्यक रहेको कोहलीले जनाएका छन् ।

विराटको कप्तानीमा भारतले सिनियर टोलीमा हालसम्म आइसिसी उपाधि जितेको छैन । अर्कोतर्फ इन्डियन प्रिमियर लिग (आइपिएल) मा रोयल च्यालेन्जर्स बेंगलोरले पनि कोहलीको कप्तानीमा उपाधि जित्न सकेको छैन । यता मुम्बई इन्डियन्सका कप्तान रोहित शर्माले आफ्नो कप्तानीमा पाँच उपाधि दिलाइसकेका छन् । लामो समयदेखि रोहित भारतको टि२० कप्तान बन्नुपर्ने माग उठ्दै आएको थियो ।

कोहलीले आइसिसी उपाधि जित्न नसकेपछि भारतलाई तीनै शैलीमा आफ्नो कप्तानीमा विश्वको एक सर्वोत्कृष्ट टोली भने बनाउन सफल भएका छन् । कोहलीले अन्तर्राष्ट्रिय क्रिकेटमा तीनै शैलीमा उच्च प्रदर्शन गर्दै आएका छन् ।