काठमाडौं (हाम्रो खेलकुद) – एभरेष्ट प्रिमियर लिग (इपिएल) को साविक विजेता ललितपुर प्याट्रीयट्सले चौथो संस्करणको लागि आफ्नो खेलाडी, प्रायोजक र प्रशिक्षक नाम सार्वजनिक गरेको छ ।

काठमाडौंमा बुधबार एक पत्रकार सम्मेलन गर्दै ललितपुरले सार्वजनिक गरेको हो । ललितपुरको प्रशिक्षकको रुपमा राजु बस्नेत छन् । ललितपुरको प्रमुख प्रायोजकको रुपमा नेपाल इन्भेष्टमेन्ट बैंक छ । गत संस्करण पनि मुख्य प्रायोजक रहेको इन्भेष्टमेन्टले ललितपुरलाई निरन्तरता दिएको हो । ललितपुरको कप्तानी नेपाली क्रिकेट टोली कप्तान ज्ञानेन्द्र मल्लले नै गर्ने छन् ।

ललितपुरले विदेशी खेलाडीको रुपमा भुटानका ब्याट्सम्यान मिक्यो दोर्जी, अफगानिस्तानका युवा अलराउन्डर आजमतुल्लाह ओमरजाई र इंग्ल्यान्डका एलेक्स ब्लेक छन् । ललितपुरमा ज्ञानेन्द्र मल्ल, सन्दीप जोरा, राशिद खान, पवन सरार्फ, कुशल भुर्तेल, सोनु तामाङ, योगेन्द्रसिंह कार्की, कमल खत्री, रिजन ढकाल, बिभत्सु थापा, अरियो पौडेल, शंखर राना, नारायण जोशी, सुर्य तामाङ स्वदेशी खेलाडीको रुपमा खेलाडी छन् ।

इपिएल असोज ९ देखि २३ सम्म टियुमा हुने छ । इपिएल विजेताले ५० लाख र उप विजेताले १५ लाख रुपैयाँ प्राप्त गर्ने छन् । ललितपुरले २०१८ को फाइनलमा भैरहवा ग्ल्याडियसटर्सलाई १४ रनले पराजित गर्दै उपाधि जितेको थियो ।