एजेन्सी – बंगलादेशसँगको पाँच टि२० आई सिरिज अन्तर्गत पहिलो खेलमा न्युजिल्यान्ड ६० रनमा अल आउट भएको छ । शेरे बंगला राष्ट्रिय स्टेडियम ढाकामा टस जितेर ब्याटिङ रोजेको न्युजिल्यान्ड १६.५ ओभरमा ६० रनमा अल आउट भएको हो ।

दोस्रो रोजाईका खेलाडी सम्मिलित न्युजिल्यान्डका ९ खेलाडीले दोहोरो अंकमा रन बनाउन सकेनन् । कप्तान टम लाथम र हेनरी निकोलसले सर्वाधिक १८–१८ रन बनाए ।

खराब सुरुवात गर्नेक्रममा एक समय ४ ओभरमा ९–४ को कमजोर अवस्थामा पुगेको न्युजिल्यान्डलाई पाँचौं विकेटका लागि लाथम र निकोलसले ४१ बलमा ३४ रनको साझेदारी गर्दै इनिङ उकास्न खोजेका थिए । तर लाथम क्याच आउट भएसँगै न्युजिल्यान्डले लगातार विकेट गुमाउँदै आफ्नो टि२० आई इतिहासकै कम योगफल बराबर गरेको हो ।

न्युजिल्यान्डका ओपनर टम ब्लन्डेल २, रचिन रभिन्द्र शून्य, विल योंग ५, कोलिन डि ग्रान्डहोम १, अजाज पटेल ३ र डग ब्रेसवेल ५ रनमा आउट भए ।

बंगलादेशका तीव्र गतिका बलर मुश्ताफिजुर रहमानले २.५ ओभरमा १३ रन खर्चेर ३ विकेट लिए । नासुम अहमद, मोहम्मद सैफुद्दिन र सकिब अल हसनले २–२ विकेट लिए । माहेदी हसनले एक विकेट लिए । यसअघि टि२० आईमा २०१४ मा श्रीलंकाविरुद्ध न्युजिल्यान्ड ६० रनमै अल आउट भएको थियो ।