काठमाडौं (हाम्रो खेलकुद) – भुटान क्रिकेट टोलीका युवा ब्याट्सम्यान रञ्जंग मिक्यो दोर्जीले आगमी संस्करणको एभरेष्ट प्रिमियर लिग(इपिएल) खेल्ने भएका छन् । दोर्जीलाई ज्ञानेन्द्र मल्ल कप्तान रहेको ललितपुर प्याट्रियटर्सले टोलीमा अनुबन्ध गरेको हो ।

उनले २०१९ को १३ औं दक्षिक्षण एसियाली खेलकुद (साग) मा नेपालविरुद्ध टि२० आईमा डेब्यू गर्दै २७ रन बनाएका थिए । उक्त खेलमा दोर्जीले ललितनारायण राजवंशीलाई दुई, पवन सरार्फ र सुशन भारीलाई एक एक छक्का प्रहार गरेका थिए । टियुमै श्रीलंका यू२३ विरुद्ध उनले १५ बलमा ३ छक्का सहित २२ रन जोडेका थिए ।

‘साविक विजेता ललितपुरबाट इपिएल खेल्न निकै उत्साहित छु । मलाई अवसर दिएकोम धन्यावाद । नेपाली समर्थक सामू पुन खेल्न पाउँदा एकदमै खुसी र गर्व महसुस भएको छ’ , दोर्जीले भने ।

उनी आक्रामक ब्याटिङ गर्न रुचाउँछन् । भुटानबाट विदेशी लिग खेल्ने उनी पहिलो खेलाडी पनि बनेका छन् । दोर्जी भुटानका प्रमुख खेलाडी समेत हुन् । ललितपुरले पहिलो विदेशी खेलाडीको रुपमा श्रीलंका एलेक्स ब्लेकको नाम सार्वजनिक गरेको थियो । उनी भुटान क्रिकेटलाई नयाँ स्तरमा पुर्याउन सक्ने क्षमता भएका खेलाडी हुन् ।

साविक विजेता ललितपुरमा ज्ञानेन्द्र मल्ल, सन्दीप जोरा, पवन सरार्फ, कुशल भुर्तेल, सोनु तामाङ र योगेन्द्रसिंह कार्की लगायतका खेलाडी छन् । ट्यालेन्ट हन्टबाट बिभत्सु थापा र अरियो पौडेल छानिएका थिए । इपिएल असोज ९ देखि २३ सम्म टियुमा हुने छ ।