एजेन्सी – भारतीय क्रिकेट टोलीका कप्तान विराट कोहली इंग्ल्यान्डविरुद्ध तेस्रो खेलको पहिलो इनिङमा सस्तैमा आउट भएका छन् । लिड्समा टस जितेर पहिला ब्याटिङ रोजेको भारतले खराब सुरुवात गरेको छ ।

खराब सुरुवात गरेको भारतका कप्तान विराट कोहली दोहोरो अंकमा रन जोड्न नपाउँदै आउट हुन पुगे । कोहलीलाई ११ औं ओभरको पाँचौं बलमा तीव्र गतिका बलर जेम्श एन्डरसनले सात रनमा विकेटकिपर जस बटलरबाट क्याच आउट गराउँदै इंग्ल्यान्डलाई सर्वाधिक ठूलो सफलता दिलाएका छन् । कोहली एज लागेर आउट हुन पुगेका थिए ।

कोहली दुई वर्षदेखि टेस्टमा शतक विहिन छन् । इंग्ल्यान्ड भ्रमणमा सुरुवाती दुई खेलमा पनि राम्रो प्रदर्शन हुन सकेको छैन । पहिलो खेलमा गोल्डेन डक आउट भएका कोहली दोस्रो खेलमा २० र ४२ रनमा आउट भएका थिए ।

भारतले पहिलो ओभरको पाँचौं बलमा ओपनर लोकेश राहुललाई शून्यमा गुमाएको थियो । एन्डरसनको बलमा बटलरबाट राहुल क्याच आउट हुन पुगेका थिए । पाँचौं ओभरको पहिलो बलमा चेतेश्वर पुजारालाई एन्डरसनले एक रनमानै बटलरबाट क्याच आउट गराएका थिए । भारत पहिलो सेसनको १६ ओभरमा ३१–३ को कमजोर अवस्थामा छ । रोहित शर्मा ९ र अजिक्या रहाणे एक रनमा क्रिजमा छन् ।

पहिलो खेल बराबरीमा सकिँदा भारत दोस्रो खेलमा १ सय ५१ रनको फराकिलो अन्तरले विजयी भएको थियो । पाँच टेस्ट सिरिजमा भारतले १–० को अग्रता लिएको छ ।