एजेन्सी – कप्तान बाबर आजम र फवाद आलम चम्कँदा पाकिस्तानले वेस्टइन्डिजसँगको दोस्रो टेस्ट खेलमा राम्रो पूनरागमन गरेको छ । दोस्रो टेस्टको पहिलो दिन टस हारेर ब्याटिङ थालेको पाकिस्तान ७४ ओभरमा २१२–४ को अवस्थामा खेल सकिएको छ । फवाद १ सय ४९ बलमा ७६ रनमा रिटायर्ट हर्ट भएका छन् ।

बाबर १ सय ७४ बलमा १३ चौका सहित ७५ रनमा क्याच आउट भए । एक समय २–३ को कमजोर अवस्थामा पुगेको पाकिस्तानलाई चौथो विकेटका लागि फवाद र बाबरले २ सय ९८ बलमा १ सय ५८ रनको उत्कृष्ट शतकीय साझेदारी गरेपछि खेलमा पूनरागमन गरेको थियो । तीव्र गतिका बलर केमार रोचले बाबरलाई ६१ औं ओभरमा जेसन होल्डरबाट क्याच गराउँदै साझेदारी तोडेका थिए ।

रोचले पहिलो ओभरको तेस्रो बलमै ओपनर आबिद अलीलाई एक रनमा क्याच आउट गराए । तेस्रो ओभरको तेस्रो बलमा रोचलेनै अजहर अलीलाई विकेटकिपर जोशुवा डि सिल्भाबाट शून्यमा क्याच आउट गराए । अर्का तीव्र गतिका बलर जयडेन सिल्सले ओपनर इमरान बटलाई एक रनमा क्याच गराउँदा पाकिस्तान २–३ को संकट अवस्थामा पुगेको थियो । उक्त कठिन अवस्थाबाट बाबर र फवादले पाकिस्तानलाई सम्हालेका थिए ।

पाकिस्तानका विकेटकिपर मोहम्मद रिजवान २२ र फहिम अशरफ २३ रनमा अविजित छन् । केमार रोचले तीन र जयडेन सिल्सले एक विकेट लिएका छन् । दुई टेस्ट सिरिजको पहिलो खेलमा वेस्टइन्डिज एक विकेटले विजयी भएको थियो ।