काठमाडौं (हाम्रो खेलकुद) – अर्को महिना आयोजना हुने बजाज पल्सर एभरेष्ट प्रिमियर लिग (इपिएल) को देश भित्र प्रत्यक्ष प्रसारण हिमालय टेलिभिजनले गर्ने भएको छ । कीर्तिपुरस्थित टियू मैदानमा असोज ९ देखि २३ गते सम्म इपिएलको चौथो संस्करण आयोजना हुँदैछ ।

इपिएलको साझेदार एडप्याडले प्रसारण अधिकारमा हिमालय टेलिभिजनसहित अन्य प्रायोजकसँग शुक्रबार सम्झौता पत्र आदान प्रदान गरेको छ । एडप्याडका सुरज गिरी र हिमालय टेलिभिजनका कार्यकारी निर्देशक श्याम कँडेलले सम्झौता पत्र आदान प्रदान गरे । डिजिटल प्लाटफर्ममा प्रत्यक्ष प्रसारणका लागि भने इपिएलले यसअघि नै ओएसआर स्पोर्टस्सँग सम्झौता गरिसकेको छ ।

हिमालय टेलिभिजनले यसअघि दुई पटक पोखरा प्रिमियर लिग (पिपिएल) को प्रत्यक्ष प्रसारण गरेको थियो । त्यस्तै नेपाल, नेदरल्यान्ड्स र मलेसियासम्मिलित त्रिकोणात्मक श्रृखंलाको पनि प्रत्यक्ष प्रसारण गरेको थियो । एडप्याडले इपिएल संस्थापक आमिर अख्तरसँग पनि सम्झौता पत्र आदान प्रदान गर्यो ।

त्रिवेणी ग्रुपका निर्देशक आदित्य सांघाई, अ‍ोएसआर स्पोर्ट्सका प्रबन्ध निर्देशक अ‍ोम अग्रवाल, रमेश कर्पका उपाध्यक्ष रोहित गुप्ता, डाबर नेपालका बजार व्यवस्थापन प्रमुख अभय गोर्खाली र एड रिलिजका दीपक कोइरालाले सम्झौता पत्र आदान प्रदान गरेका थिए ।

इपिएलको यसपटकको सिजनमा पाकिस्तानी क्रिकेट खेलाडी शाहिद अफ्रिदि काठमाडौँ किंग्स–११ र श्रीलंकाका पूर्वकप्तान दिनेश चण्डीमाल भैरहवा ग्ल्याडिएटर्सबाट खेल्ने सम्बन्धित टोलीले यसअघि नै जानकारी गराइसकेका छन् । पाकिस्तानी दानीश अजिज चितवन टाइगर्सबाट खेल्दैछन् ।