एजेन्सी – यू१९ विश्वकप विजेता कप्तान तथा शीर्षक्रमका ब्याट्सम्यान उन्मुक्त चन्दले २८ वर्षकै उमेरमा भारतीय क्रिकेटबाट सन्न्यासको घोषणा गरेका छन् । भारतीय सिनियर टोलीमा लामो प्रतिक्षा गरिरहँदा पनि मौका नपाएपछि चन्दले सन्न्यासको घोषणा हुन् ।

एक समय चन्दलाई भारतीय क्रिकेटको ब्याटिङको भविष्य मानिएको थियो । तर भारतीय क्रिकेटमा तीव्र प्रतिस्पर्धामा उनले आफ्नो स्थान बनाउन सकेनन् । चन्दको कप्तानीमा भारतले सन् २०१२ मा यू१९ विश्वकप जितेको थियो । त्यसअघि २००८ मा विराट कोहलीको कप्तानीमा भारतले फाइनलमा दक्षिण अफ्रिकालाई डकवर्थ लेविस पद्धतिको आधारमा १२ रनले हराउँदै यू१९ विश्वकप जितेको थियो ।

चन्दले फाइनलमा अष्ट्रेलियालाई ६ विकेटले हराउँदै भारतलाई उपाधि जिताउँदा १ सय ३० बलमा ७ चौका र ६ छक्का सहित कुल १ सय ११ रनको उत्कृष्ट शतकीय इनिङ खेलेका थिए ।

चन्दले उच्च स्तरको क्रिकेट खेल्ने आफ्नो लक्ष्य रहेको बताएका छन् । अब उनलाई अन्य देशबाट क्रिकेट खेल्न बाटो खुलेको छ । चन्द अमेरिकाबाट क्रिकेट खेल्ने तयारीमा छन् । उनले आइपिएल दिल्ली क्यापिटल्स, मुम्बई इन्डियन्स र राजस्थान रोयल्सबाट खेलेका छन् । सुरुवाती समय दिल्लीबाट घरेलु क्रिकेट खेलेका उनले त्यहाँ राम्रो मौका नपाएपछि पछिल्लो समय उत्तरखण्डबाट खेलेका थिए । चन्दले ७७ प्रथम श्रेणी, १ सय २० लिष्ट ए र ७७ टि२० आई खेलेका छन् ।

प्रथम श्रेणीमा ८ शतक र १६ अर्धशतक सहित कुल ३ हजार ३ सय ७९ रन बनाएका छन् । उत्कृष्ट प्रदर्शन १ सय ५१ रन छ । लिष्ट ए मा ७ शतक र ३२ अर्धशतक सहित कुल ४ हजार ५ सय ५ रन बनाएका छन् । लिष्ट ए मा ३ शतक र ५ अर्धशतक सहित कुल १ हजार ५ सय ६५ रन जोडेका छन् ।

अमेरिकाले पछिल्लो समय टेस्ट टोलीबाट खेलाडी ल्याउँदै नयाँ टिम निर्माण गर्न लागेको छ । जसमा भारत सहित थुप्रै टेस्ट देशका खेलाडी अमेरिकाले केहि महिना अघि परिक्षणको लागि गएका थिए । न्युजिल्यान्डका स्टार अलराउन्डर कोरी एन्डरसन र इंग्ल्यान्डका विश्वकप विजेता लियाम प्लन्केटले पनि अमेरिकाबाट क्रिकेट खेल्दै छन् ।

अघिल्लो महिना प्रतिबन्धमा परेको श्रीलंका स्टार क्रिकेटर कुसल मेन्डिस, निरोशन डिक्वेला र दानुश्का गुणाथिलका पनि अमेरिकाबाट क्रिकेट खेल्ने चर्चा छ ।