एजेन्सी – वेस्टइन्डिजका स्टार अलराउन्डर कार्लोस ब्रेथवेट र पाकिस्तानका अनुभवी ब्याट्सम्यान शोएब मलिकले आगमी संस्करणको एभरेष्ट प्रिमियर लिग(इपिएल) खेल्ने भएका छन् ।

आगमी असोज ९ देखि टियु मैदानमा सुरु हुने प्रतियोगितामा विश्वकप विजेता ब्रेथवेट र मलिकलले इपिएल खेल्ने पक्का भएको आयोजकले जनाएको छ । आयोजकले सोमबार एक पत्रकार सम्मेलन गर्दै ब्रेथवेट र मलिक इपिएल खेल्ने पक्का भएको जनाएको छ । कुन टोलीबाट भने सार्वजनिक गरेको छैन । वेस्टइन्डिजका ब्रेथवेट २०१६ को टि२० विश्वकप जिताउँदा नायक हुन् ।

उक्त फाइनलमा अन्तिम ओभरमा १९ रन चाहिँएको अवस्थामा इंग्ल्यान्डका बेन स्टोक्सलाई लगातार चार छक्का प्रहार गर्दै ब्रेथवेटले टि२० विश्वकप जिताएका थिए । मलिक पाकिस्तानका सर्वाधिक सफल टि२० खेलाडी हुन् ।

तीव्र गतिसँगै ब्रेथवेट राम्रो ब्याटिङको क्षमता राख्छन् । सन् २०१९ को एकदिवसिय विश्वकपमा ब्रेथवेटले न्युजिल्यान्डविरुद्ध सानदार शतकीय इनिङ खेलेका थिए । ब्रेथवेटले वेस्टइन्डिजबाट तीन टेस्ट, ४४ ओडिआई र ४१ टि२० आई खेलेका छन् ।

मलिक पाकिस्तानका पूर्व कप्तान हुन् । २००९ को टि२० विश्वकप पाकिस्तानलाई जिताउन मलिकको प्रदर्शन उच्च थियो । उनले पाकिस्तानबाट ३५ टेस्ट, २ सय ८७ ओडिआई, १ सय १६ टि२० आई र ४ सय २५ टि२० खेल खेलेका छन् । मलिक टि२० आई सर्वाधिक धेरै खेल खेल्ने विश्वका खेलाडी हुन् । मलिकपछि भारतीय क्रिकेट टोलीका ओपनर रोहित शर्माले १ सय १३ खेल खेलेका छन् । मलिक राम्रो पार्टटाइम स्पिनर समेत हुन् ।

पाकिस्तानका शाहिद अफ्रिदीले काठमाडौं किंग्स ११ बाट खेल्ने यसअघिनै औपचारिक रुपमा सार्वजनिक भई सकेको छ । चितवनले पाकिस्तानका डानिश अजिजको नाम सार्वजनिक गर्ने भएको छ । चौथो संस्करणको इपिएलको मुख्य प्रयोजक बजाज पल्सर रहने भएको छ । चौथो संस्करणको इपिएल असोज ९ देखि २३ सम्म टियु मैदानमा हुने छ ।