काठमाडौं (हाम्रो खेलकुद) – पाकिस्तानका अन्तर्राष्ट्रिय खेलाडी दानिश अजिजले एभरेष्ट प्रिमियर लिग (ईपीएल) मा चितवन टाइगर्सबाट खेल्ने भएका छन् । यस सिजनको इपिएल असोज ९ गते देखि त्रिभुवन विश्वविद्यालय अन्तर्राष्ट्रिय क्रिकेट मैदान कीर्तिपुरमा हुँदैछ ।

अजिज चितवनले घोषणा गरेको पहिलो विदेशी खेलाडी हुन् । देव्रे हाते युवा ब्याट्सम्यानले यसैवर्ष पाकिस्तानबाट क्रमश दक्षिण अफ्रिका र जिम्बावेविरुद्ध खेल्दै एकदिवसीय र टि२० अन्तर्राष्ट्रियमा डेब्यु गरेका थिए । टोलीले यसअघि नै सोमपाल कामीलाई टोलीको कप्तानको जिम्मेवारी दिइसकेको छ । सोमपाल यसै सिजनका लागि काठमाडौं किंग्स ११ बाट चितवन आएका हुन् ।

अजिजको आगमनले टोलीको ब्याटिङ बलियो हुने चितवनकी निर्देशक विनिता चौधरीले बताइन् । ‘ अजिजलाई विदेशी खेलाडीको रुपमा भित्र्याउँदा हामी उत्साहित छौं । पाकिस्तानको भविष्यको ब्याट्सम्यानको रुपमा उनलाई हेरिएको छ । उनको बिग हिटिङ र फिनिसिङ क्षमताले हाम्रो युवा ब्याटिङ लाइनअपलाई नायाँ आयाम दिनेछ,’ चौधरीले भनिन् ।

अन्तर्राष्ट्रिय क्रिकेट परिषद् (आईसीसी) बाट मान्यता प्राप्त इपीएल २०२१ को आयोजना मितिलाई नेपाल क्रिकेट संघ (क्यान) ले स्विकृत गरिसकेको छ । यसअघि कोरोना संक्रमणका कारण स्थगित प्रतियोगिता यसपटक भने समयमा नै गर्ने इपिएलको लक्ष्य छ । चितवनले यसअघि विदेशी खेलाडीमा टिम डेविड, जेम्स फुलर लगायतलाई अनुबन्ध गरेको थियो ।