एजेन्सी – वेस्टइन्डिज तथा विश्व क्रिकेटका सर्वाधिक सफल टि२० ब्याट्सम्यान क्रिस गेलले चौथो संस्करणको एभरेष्ट प्रिमियर लिग (इपिएल) नखेल्ने पक्का भएको छ ।

गतवर्ष माघमा गेललाई पोखरा राइनोजले औपचारिक रुपमै सम्झौता गरेको थियो । चैतमा हुनुपर्ने इपिएल कोरोना कारण स्थगित भएपछि गेलको सहभागिता हुने वा नहुने अनिश्चित थियो । पोखरा राइनोजका निर्देशक तथा पूर्व नेपाली क्रिकेटर दीपेन्द्र चौधरीले गेल नआउने पुष्टि गरे ।

आइपिएल र विश्वकपको कारण गेल नआउने पक्का भएको उनले जनाए । ‘हामीहरु नयाँ विदेशी खेलाडीको खोजीमा छौं । पक्का भइसकेको छैन । यो हप्ता सम्म कुन खेलाडी चाहिन्छ पक्का हुन्छ होला । विश्व क्रिकेटकै स्टार खेलाडी ल्याउन प्रयासरत छौं’, दीपेन्द्रले भने ।

‘आइपिएल पनि छ, विश्वकप र इपिएल पनि एकै समयतिर छ । यसले गर्दा हामी दोधारमा छौं । पोखराले छनोट गरेको सबै खेलाडी विश्वकप टोलीमा छन् । जर्ज मुन्शे स्कटल्यान्डको टोलीमा जानेछन् । हामीले आउने वा नआउनेबारे मुन्शेसँग कुरा गरिरहेका छौं । विश्वकप र आइपिएललाई हेर्दै हामी अन्तिम चार विदेशी खेलाडी निर्धारण गर्ने छौं’, उनले हाम्रो खेलकुदसँग भने । पोखरा अहिले ६,७ जना स्टार विदेशी खेलाडीसँग कुरा गरिरहेको छ ।

२०१८ को सिजनमा पोखराले दक्षिण अफ्रिका ओपनर रचिर्ड लेभी, स्कटल्यान्डका कप्तान काईल कोट्जर र इंग्ल्यान्डका पाउल कगलिन टोलीमा थिए । पोखरा ५ खेलमा ५ मानै हारका साथ पुछारमा रहँदै बाहिरिएको थियो ।

रिचार्ड लेभी (दायाँ) र काइल कोट्जर

गतवर्ष गेलले आइपिएल खेल्नुअघि इपिएलका खेल खेलेर जाने बताइएको थियो । तर इपिएल कोरोना कारण अन्तिम चरणमा फागुनमा स्थगित भएको थियो । इपिएलको चौथो संस्करण सेप्टेम्बर २५ देखि अक्टोबर ९ सम्म टियु मैदानमा हुँदै छ । यता आइपिएल सेप्टेम्बर १९ देखि अक्टोबर १५ सम्म यूएईमा हुँदै छ । कोरोना कारण आइपिएल मध्य सिजनपछि गत वैशाखमा स्थगित भएको थियो । टि२० विश्वकप अक्टोर १७ देखि नोभेम्बर १४ सम्म युएई र ओमानमा हुँदै छ । जसको कारण गेल नेपाल नआउने निश्चित भएको हो ।

किंग्स इलेभेन पन्जाबमा आबद्ध गेलले आइपिएल पनि नखेल्ने सम्भावना छ । वेस्टइन्डिज टोली विश्वकप तयारीमा छ । फिटनेश, क्वारेनटाइन र विश्वकप तयारीको कारण गेल लगायतका थुप्रै स्टार खेलाडीले आइपिएल खेल्ने सम्भावना कम देखिन्छ । अष्ट्रेलिया र दक्षिण अफ्रिकासँग लगातार पाँच पाँच टि२० आई सिरिज खेलिसकेको छ ।

पाकिस्तानसँगको चार टि२० सिरिज बुधबारबाट सुरु हुनेछ । साविक विजेता वेस्ट इन्डिज तेस्रो विश्वकप जित्न चाहन्छ । गेल र ड्वेन ब्राभो जस्ता अनुभवी खेलाडी टोलीमा फर्किदा टोली पनि मजबुत बनेको छ । गेलले अष्ट्रेलियाविरुद्ध सिरिजसँगै टि२० मा १४ हजार रन पनि पूरा गरि सकेका छन् । इपिएलमा टि२० विश्वकप खेल्ने खेलाडी आउने सम्भावना निकै कम छ ।

सोमबार मात्र काठमाडौं किंग्स इलेभेनले विश्व क्रिकेटका एक उत्कृष्ट अलराउन्डर शाहिद अफ्रिदीलाई टोलीमा अनुबन्ध गरेको छ । इपिएलले तयारी अगाडि बढाएको छ । पोखराले गतवर्ष वेस्टइन्डिजकै केसरिक विलियम्सन र स्कटल्यान्डका जर्ज मुन्शेलाई अनुबन्ध गरेको थियो । तर मुन्शे पनि विश्वकपको कारण आउने सम्भावना कम छ । पोखरामा विकेटकिपर विनोद भण्डारी, सुनिल धमला, रित गौतम, किशोर महतो, बिक्रम शोब, बिपिन खत्री, लोकेश बम, पृथु बास्कोटा, विवेक यादव र विपिन रावल लगाएतका खेलाडी छन् ।

गेलको टि२० क्रिकेटमा ऐतिहासिक १४ हजार रन पूरा

अफ्रिदीले काठमाडौंबाट इपिएल खेल्ने