काठमाडौं (हाम्रो खेलकुद)– अमेरिकामा भ्रमणमा रहेका नेपाली राष्ट्रिय क्रिकेट टोली कप्तान पारस खड्का, अर्का सफल खेलाडी बसन्त रेग्मी र युवा खेलाडी सिद्धान्त लोहनीको सहभागितामा न्यूयोर्कको ज्याक्सन हाइटमा गएराती रात्रीभोज भएको छ ।

इन्जुरी रिलिफ फन्डका विषयमा छलफल गर्न थाकाली किचेनमा आयोजित कार्यक्रमलाई स्थानिय रुपमा जीवन श्रेष्ठ र नरबहादुर दाहालले संयोजन गरेका थिए । रात्रीभोजका क्रममा नेपाली क्रिकेट खेलाडीलाई चोटग्रस्त हुँदाको अवस्थामा सहयोग गर्ने उद्देश्यका स्थापना भएको इन्जुरी रिलिफ फन्डमा सहयोग गर्ने विषयमा पनि छलफल भएको कप्तान पारसले हाम्रो खेलकुदलाई बताए । ‘यहाँ बस्दै आउनु भएको दाईहरुले हामी यहाँ आएको बेला बोलाएर खेलाडीप्रति माया दर्शाउँदा खुसी लागेको छ’,‘आफ्नोतर्फबाट सकेको सहयोग गर्न उहाँहरु तयार रहेको पायौं । हामी नेपालमा खेलाडीका लागि इजुरी रिलिफ फन्ड को तयारीमा छौं । खेलाडीलाई चोट लाग्दा सहयोग गर्ने उद्देश्यले अलग्गै फन्ड बनाउने हामी प्रयास गरिरहेका छौं ।’

अन्तरक्रियामा अमेरिकामा बस्दै आएका नेपाली राष्ट्रिय टोलीका पूर्व खेलाडी प्रलय राजभण्डारी पनि सहभागी थिए । प्रलयले हाम्रो खेलकुदसँग भने‘ पारस, बसन्त, सिद्धान्त आउने थाहा पाउँने वित्तिकै उनीहरुलाई भेट्नका लागि म पनि सहभागी भए । नेपाली त्यसमा पनि खेलाडी भनेपछि नभेटी बस्नै सक्किन्न । पहिलो पटक उनीहरुसँग भेट्दा खुसी लाग्यो । उनी सबै मिलनसार लाग्यो । ’ पारस, सिद्धान्त, बसन्त र अन्य ५ नेपाली खेलाडी केही दिनपछि अमेरिकाको हस्टनमा आयोजना हुने टु एक्स क्रिकेट कपमा भाग लिदैछन् । पारसका अनुसार नेपाली टोलीका उपकप्तान ज्ञानेन्द्र मल्ल, शदर भेषावकर, पृथु बास्कोटा, सुवास खकुरेल र सोमपाल केही दिनमा अमेरिका पुग्दैछन् ।