एजेन्सी – भारतीय क्रिकेट टोलीका ओपनर तथा पन्जाब किंग्सका कप्तान लोकेश राहुलको सोमबार एपेन्डिसाइटिसको सफल शल्यक्रिया भएको छ । शनिवार राती पेटमा अत्याधिक दुखाईपछि राहुललाई उपचारको लागि अस्पताल लगिएको थियो ।

चिकित्सकका अनुसार राहुल एक हप्ताको विश्राम पछि मैदान फर्किन सक्ने छन् । सामान्य शल्यक्रिया भएको हुँदा लामो विश्राम गर्नु पर्दैन । आइपिएल बायो बबल नियम अनुसार उनी फेरि एक हप्ता क्वारेनटाइनमा बस्नु पर्ने हुन्छ । इन्डियन प्रिमियर लिग (आइपिएल) मा आइतबार दिल्ली क्यापिटल्ससँग खेल्नु अघि राहुललाई अस्पताल भर्ना गरिएको थियो ।

राहुल जारी आइपिएलमा सर्वाधिक रन बनाउने दोस्रो खेलाडी हुन् । सुरुवाती ७ खेलमा राहुलले चार अर्धशतक सहित ३ सय ३१ रन बनाएका छन् । पछिल्लो खेलमा बेंगलोरलाई पन्जाबले हराउन राहुलले ९१ रनको अविजित उत्कृष्ट इनिङ खेलेका थिए । राजस्थान रोयल्ससँग ९१, दिल्लीसँग ६१ र मुम्बईसँग ६० रनको इनिङ खेलेका थिए । पन्जाबले अव लिग चरणका ६ खेल खेल्न बाँकी छ । राहुल बाँकी एक हप्तामै मैदान फर्किएपनि कम्तिमा २ खेल भने गुमाउने निश्चित छ ।

दिल्लीसँगको खेलमा पन्जाबको कप्तानी युवा ओपनर मयंक अग्रवालले गरेका थिए । मयंकले कप्तानी ९९ रनको अविजित इनिङ खेलेपनि पन्जाब ७ विकेटले पराजित भएको थियो थियो । पन्जाब ८ खेलमा ५ मा हार र ३ मा जित सहित अंक तालिकामा छैटौं स्थानमा छ । पन्जाबले बिहिबार रोयल च्यालेन्जर्स बेंगलोरसँग खेल्ने छ ।