एजेन्सी – अन्तर्राष्ट्रिय क्रिकेट परिषद् (आइसिसी) को वार्षिक ओडिआई र टि २० आई वरियतामा नेपालले सुधार गरेको छ । आइसिसीले सोमबार जारी गरेको नयाँ वरियतामा नेपालले ओडिआई र टि२० आई दुबैमा एक एक स्थान सुधार गरेको छ ।

नेपाल टि२० आई वरियतामा १३ औं स्थानमा उक्लिएको छ । टि२० आई वरियतामा नेपाल एसियोसियट टोलीमा शीर्षस्थानमा छ । अघिल्लो हप्ता नेपालले मलेसिया र नेदरल्यान्ड्ससँगको टि२० आई त्रिकोणात्मक सिरिज जित्दै १४ औं स्थानमा रहेको थियो । नेपाल भन्दा पछि टि२० आई वरियतामा स्कटल्यान्ड १४, यूएई १५, पपुवा न्युगिनी १६ र नेदरल्यान्ड्स १७ औं स्थानमा छन् ।

नेपालको १९ खेलमा ३ हजार ५ सय ५६ अंक छ । रेटिङ अंक १ सय ८७ छ । टि२० वरियतामा इंग्ल्यान्ड शीर्ष, भारत दोस्रो, न्युजिल्यान्ड तेस्रो र पाकिस्तान चौथो स्थानमा छ । नेपाल भन्दाअघि आयरल्यान्ड १२, जिम्बावे ११ र वेस्टइन्डिज १० औं स्थानमा छ । त्यस्तै नेपालले ओडिआई वरियतामा एक स्थान सुधार गर्दै १६ औं स्थानमा उक्लिएको छ ।

नेपाल उक्लिदा यूएई १७ औं स्थानमा झरेको छ । स्कटल्यान्ड १५, ओमान १४ र जिम्बावे १३ औं स्थानमा छ । आयरल्यान्ड्स १२ र नेदरल्यान्ड्स ११ औं स्थानमा छन् । ओडिआई वरियतामा न्युजिल्यान्ड शीर्षक्रममा उक्लिएको छ । अष्ट्रेलिया दोस्रो, भारत तेस्रो र इंग्ल्यान्ड चौथो स्थानमा छन् ।

आइसिसीले वार्षिक वरियता २०१८/१९ तथा २०१९/२० को नतिजालाई ५० प्रतिशत आधार मान्ने गर्दछ । २०२० को नतिजालाई शत प्रतिशत आधार मान्ने गर्दछ ।