एजेन्सी – इन्डियन प्रिमियर लिग (आइपिएल) मा पन्जाब किंग्सका कप्तान तथा भारतीय क्रिकेट टोलीका ओपनर लोकेश राहुल अस्पताल भर्ना भएका छन् । शनिवार राती पेटमा अत्याधिक दुखाईको कारण औषधी प्रयोग गरेपनि ठिक नभएपछि उपचारको राहुललाई अस्पताल लगिएको थियो ।

राहुललाई एपेन्डिसाइटिस भएको पन्जाब किंग्सले जनाएको छ । उनको उपचार शल्यक्रियामार्फत हुने छ । योसँगै लाहुलले बाँकी खेल पनि गुमाउने निश्चित देखिन्छ । पन्जाबले आज साँझनै दिल्ली क्यापिटलससँग खेल्ने छ । राहुल नहुँदा पन्जाबलाई ठूलो झट्का लाग्ने छ । राहुल पन्जाबका प्रमुख हतियार हुन् । यस सिजनमा पनि उत्कृष्ट लयमा देखिएका छन् ।

पन्जाबले पछिल्लो खेलमा रोयल च्यालेन्जर्स बेंगलोरलाई ३४ रनले हराएको थियो । जसक्रममा कप्तान लोकेश राहुलले ९१ रनको उत्कृष्ट इनिङ खेलेका थिए । राहुल नहुँदा ब्याटिङमा समस्या पर्ने देखिएको छ । मयंक अग्रवाल पनि चोटका कारण बेंगलोरसँगको खेल खेलेका थिए । राहुल नहुँदा पन्जाबको कप्तानी क्रिस गेल, निकोलस पुरन र मोहम्मद शामी मध्य एकले गर्ने सम्भावना देखिन्छ । गेलको सम्भावना उच्च देखिन्छ ।

पन्जाब र दिल्लीबीचको खेल नेपाली समय अनुसार आज (आइतबार) साँझ ७ : ४५ मा नरेन्द्र मोदी स्टेडियम अहमदाबादमा हुने छ । दिल्ली ७ खेलमा ५ मा जित र २ मा हार सहित १० अंकका साथ दोस्रो स्थानमा छ । दिल्ली आजको खेलमा विजयी भए १२ अंकका साथ शीर्षस्थानमा उक्लिने छ ।

शीर्षस्थानमा रहेको चेन्नई सुपर किंग्सको ७ खेलमा १० अंक छ । पन्जाब ७ खेलमा ३ मा जित र ४ मा हार सहित ६ अंक जोड्दै पाँचौं स्थानमा छ । पन्जाब आजको खेलमा विजयी भए चौथो स्थानमा उक्लिने समीकरण छ ।