एजेन्सी – इन्डियन प्रिमियर लिग (आइपिएल) २०२१ को २८ औं खेलमा राजस्थान रोयल्स र सनराइजर्स हैदराबादबीच प्रतिस्पर्धा हुँदै छ । खेल नेपाली समय अनुसार दिउँसो ३ः ४५ मा अरुण जेटली स्टेडियम दिल्लीमा सुरु हुने छ । हैदराबाद ६ खेलमा १ मा जित र ५ मा हार सहित पुछारमा छ ।

राजस्थान समान खेलमा २ मा जित र ४ मा हार सहित सातौं स्थानमा छ । राजस्थानसँग खेल्नुअघि हैदराबादले कप्तान परिवर्तन गरेको छ । डेविड वार्नरको स्थानमा केन विलियम्सनले कप्तानी गर्ने छन् । हैदराबाद विलियम्सनको कप्तानीमा टोलीमा परिवर्तनका साथ उत्कृष्ट नतिजा निकाल्न चाहन्छ । राजस्थान तेस्रो जित निकाल्ने सोचमा छ । दुबै टोलीलाई शीर्ष चारमा रहेर प्लेअफ खेल्ने आशा कायमै राख्न बलियो बनाउन आजको खेल जित्नै पर्ने दबाब छ ।

दुबै टोलीको कमजोर ब्याटिङ प्रमुख समस्या हो । हैदराबादले आजको खेलमा डेविड वार्नरको स्थानमा इंग्ल्यान्डका ओपनर जेयस रोयलाई मौका दिन सक्छ । वार्नरले यस सिजनमा प्रदर्शनमा संघर्ष गर्दै आएका छन् । रोय र जोनी बेयरस्टोको साथ ओपनिङमा उत्कृष्ट सुरुवात चाहन्छ । मनिष पाण्डे र केन विलियम्सन मध्यक्रममा हतियार हुन् । यी दुई ब्याट्सम्यानको उच्च प्रदर्शन विना हैदराबादलाई जितको लागि कठिन पर्ने देखिन्छ ।

केदार जाधवको स्थानमा युवा ब्याट्सम्यान प्रियम गर्ग वा अब्दुल सामद मध्य एकलाई मौका दिन सक्छ । तीन तीव्र गतिका बलरमा खलिल अहमद, सन्दीप शर्मा र सिद्धार्थ कौललाई खेलाउने सम्भावना देखिन्छ । पार्ट टाइम तीव्र गतिका बलरमा विजय शंकर रहने छन् । स्पिनरमा राशिद खानलाई खेलाउने छ । जगदिश सुचिथ अलरान्डरको रुपमा खेल्ने छन् ।

राजस्थानको ओपनिङ जस बटलर र यशस्वी जैसवालले गर्ने छन् । अघिल्लो खेलमा मुम्बईसँग पराजित भएपनि यी दुई खेलाडीले राम्रो सुरुवात दिलाएका थिए । सुरुवात पाई सकेपछि ठूलो इनिङमा भने बदल्न आवश्यक देखिन्छ । कप्तान सञ्जु स्यामसनलाई ठूलो इनिङ खेल्न आवश्यक देखिन्छ । डेविड मिलर, शिवम दुबे र राहुल टेवाटियाबाट राजस्थान उत्कृष्ट प्रदर्शन चाहन्छ । मिलरको स्थानमा राजस्थानले लियमा लिभिङस्टोनलाई मौका दिन सक्छ ।

स्टोन ठूला सट र इनिङको लागि परिचित छन् । युवा तीव्र गतिक बलर चेतन सकारियले लगातार राम्रो प्रदर्शन गर्दै आएका छन् । प्रमुख तीव्र गतिका बलर क्रिस मोरिसलाई सकारिया, जयदेव उनादकट र मुस्ताफिजुर रहमानले राम्रो साथ दिन आवश्यक देखिन्छ । रहमानलाई बेन्चमा राख्दै मिलर र लिभिङस्टोन दुबै ब्याट्सम्यानलाई मैदान उतार्न पनि सक्छ ।

हेड टु हेड :

राजस्थान र हैदराबादबीच कुल १३ खेल भएको छ । राजस्थान ६ र हैदराबाद ७ खेलमा विजयी भएको छ । गतवर्ष पहिलो खेलमा राजस्थान ५ विकेटले विजयी हुँदा दोस्रो खेलमा ८ विकेटले पराजित भएको थियो । पछिल्ला पाँच खेलमा हैदराबाद ३ खेलमा विजयी हुँदा २ खेलमा पराजित भएको छ ।

अंक तालिका

चेन्नई सुपर किंग्स ७ खेलमा ५ जित र २ मा हार सहित १० अंक सहित शीर्षस्थानमा छ । दिल्ली क्यापिटल्स ७ खेलमा ५ मा जित र २ मा हार सहित १० अंकका साथ दोस्रो स्थानमा छ । रोयल च्यालेन्जर्स बेंगलोर ७ खेलमा ५ मा जित र २ मा हार सहित १० अंक भएपनि नेट रनरेटको आधारमा तेस्रो स्थानमा छ । मुम्बई इन्डियन्स ७ खेलमा ३ मा हार र ४ मा जित सहित ८ अंक बटुल्दै चौथो स्थानमा छ ।

पन्जाब ७ खेलमा ४ मा हार र ३ मा जित सहित ६ अंक जोड्दै पाँचौं स्थानमा छ । कोलकाता ७ खेलमा ५ मा हार र २ जित सहित ४ अंकका साथ छैटौं स्थानमा छ । राजस्थान रोयल्स ६ खेलमा ४ मा हार र २ मा जित सहित ४ अंकका साथ सातौं स्थानमा छ । सनराइजर्स हैदराबाद ६ खेलमा ५ मा हार र १ मा जित सहित २ अंक जोड्दै पुछारमा छ । मुम्बईले अव मंगलबार हैदराबादसँग खेल्ने छ । चेन्नईले बुधबार राजस्थान रोयल्ससँग खेल्ने छ ।