एजेन्सी – इन्डियन प्रिमियर लिग (आइपिएल) २०२१ मा चेन्नई सुपर किंग्सले मुम्बई इन्डियन्सलाई २ सय १९ रनको विशाल लक्ष्य दिएको छ । अरुण जेटली स्टेडियम दिल्लीमा टस हारेर पहिला ब्याटिङ थालेको चेन्नईले निर्धारित २० ओभरमा ४ विकेट गुमाउँदै २ सय १८ रन बनायो ।

उत्कृष्ट अन्त्य गर्नेक्रममा चेन्नईका मध्यक्रमका ब्याट्सम्यान अम्बाती रायुडूले विष्फोटक इनिङ खेल्दै २७ बलमा ४ चौका र ७ छक्का सहित सर्वाधिक ७२ रनमा अविजित रहे । रायुडूले मात्र २० बलमा अर्धशतक प्रहार गरेका थिए । मोईन अलीले ३६ बलमा ५ चौका र ५ छक्का सहित ५८ रनको योगदान दिए । फाफ डु प्लेसिसले पनि अर्धशतकीय इनिङ खेले ।

तीव्र गतिका बलर ट्रेन्ट बोल्टले पहिलो ओभरको चौथो बलमा ओपनर ऋतुराज गायकवाडलाई ४ रनमा हार्दिक पान्ड्याबाट प्वाइन्टमा क्याच गराउँदै मुम्बईलाई पहिलो सफलता दिलाएका थिए । तर त्यसपछि दोस्रो विकेटका लागि मोईन अली र फाफ डु प्लेसिसले १ सय ८ रनको उत्कृष्ट शतकीय साझेदारी गरेपछि चेन्नई विशालयोगफल तर्फअघि बढेको थियो ।

जस्प्रित बुमराहले ११ औं ओभरको पाँचौं बलमा अलीलाई क्विन्टन डी ककबाट क्याच गराउँदै साझेदारी तोडेका थिए । चेन्नईले मात्र चार रन जोड्न तीन विकेट गुमाएपछि रनको गतिमा केहि कमि आएको थियो । लगत्तै अर्को ओभरको पाँचौ बलमा फाफ डु प्लेसिसलाई काइरन पोलार्डले जस्प्रित बुमराहबाट ५० रनमा क्याच आउट हुन पुगेका थिए । स्कुप सट खेलेका डु प्लेसिस फाइन लेगमा समातिन पुगेका थिए ।

डु प्लेसिसले २८ बलमा २ चौका र ४ छक्का प्रहार गरे । डु प्लेसिसको जारी आइपिएलमा यो लगातार चौथो अर्धशतक हो । लगत्तै अर्को बलमा सुरेश रैना ठूलो सट खेल्नेधुनमा डीप मिडविकेटमा क्रुनाल पान्ड्याबाट २ रनमा समातिन पुगे । पाँचौं विकेटका लागि रायुडू र रविन्द्र जडेजाले ४९ बलमा १ सय २ रनको उत्कृष्ट अविजित शतकीय साझेदारी गरेपछि चेन्नईले विशाल योगफल तयार पारेको हो । जडेजा २२ बलमा २ चौका सहित २२ रनमा अविजित रहे ।

मुम्बईका काइरन पोलार्डले २ ओभरमा १२ रन खर्चेर २ विकेट लिए । जस्प्रित बुमराहले ४ ओभरमा ५६ रन खर्चेर १ विकेट लिए । बुमराहको आइपिएल इतिहासकै खराब प्रदर्शन हो । ट्रेन्ट बोल्टको नाममा १ विकेट रह्यो ।