एजेन्सी – कप्तान लोकेश राहुलको उत्कृष्ट ब्याटिङमा पन्जाब किंग्सले इन्डियन प्रिमियर लिग (आइपिएल) २०२१ को २६ औं खेलमा रोयल च्यालेन्जर्स बेंगलोरलाई १ सय ८० रनको बलियो लक्ष्य दिएको छ ।

नरेन्द्र मोदी स्टेडियम अहमदाबादमा टस हारेर ब्याटिङ थालेको पन्जाबले निर्धारित २० ओभरमा ५ विकेट गुमाउँदै १ सय ७९ रन बनायो । पन्जाबका कप्तान लोकेश राहुल ५७ बलमा ७ चौका र ५ छक्का सहित सर्वाधिक ९१ रनमा अविजित रहे ।

चौथो ओभरको तेस्रो बलमा ओपनर प्रभस्म्रन सिंहलाई काइल जामिसनले विराट कोहलीबाट ७ रनमा क्याच गराउँदै पहिलो सफलता दिलाएका थिए । नियमित ओपनर मयंक अग्रवाल फिट नहुँदा सिंहलाई मौका दिएको थियो । दोस्रो विकेटका लागि राहुल र क्रिस गेलले ४५ बलमा ८० रनको साझेदारी गर्दै विशाल योगफलको सम्भावना देखाएका थिए । तर ११ औं ओभरको चौथो बलमा ड्यानियल साम्सको बाउन्सर बलमा गेल एवि डिभिलियर्सबाट ४६ रनमा क्याच आउट हुन पुगेपछि पन्जाबले लगातार विकेट गुमाउँदा विशाल योगफल बनाउन चुकेको थियो ।

गेलले २४ बलमा ६ चौका र २ छक्का प्रहार गरे । त्यसअघि गेलले छैटौं ओभरमा काइल जामिसनलाई गेलले पाँच चौका प्रहार गरेका थिए । गेल आउट भएसँगै बेंगलोरले खेलमा पूनरागमन गरेको थियो । निकोलस पुरन शून्य, दीपक हुडा ५ र शाहरुख खान शून्यमा आउट हुँदा पन्जाब ११८–५ को कमजोर अवस्थामा पुगेको थियो ।

पन्जाबले १७ रन जोड्न मध्यक्रमका प्रमुख ४ विकेट गुमाएको थियो । तल्लोक्रममा युवा ब्याट्सम्यान हरप्रित ब्रार १७ बलमा १ चौका र २ छक्का सहित २५ रनमा अविजित रहे । राहुल र ब्रारले छैटौं विकेटका लागि ३२ बलमा ६१ रनको अविजित उत्कृष्ट साझेदारी गरेपछि मध्यक्रममा धरासय बनेको पन्जाबले बलियो योगफल तयार पारेको हो ।

बेंगलोरका तीव्र गतिका बलर काइल जामिसनले ३ ओभरमा ३२ रन खर्चेर २ विकेट लिए । युजभेन्द्र चहल, ड्यानियल साम्स, शाहवाज अहमदले १–१ विकेट लिए ।