एजेन्सी – चेन्नई सुपर किंग्सले इन्डियन प्रिमियर लिग (आइपिएल) मा सनराइजर्स हैदराबादलाई ७ विकेटले पराजित गर्दै अंक तालिकामा शीर्ष स्थानमा उक्लिएको छ ।

बुधबार राती हैदराबादमाथि सानदार जित निकाल्दै चेन्नईले रोयल च्यालेन्जर्स बेंगलोरलाई पछि पार्दै शीर्षस्थानमा उक्लिएको थियो । जितको लागि १ सय ७२ रनको विजयी लक्ष्य पछ्याएको चेन्नईले १८.३ ओभरमा ३ विकेट गुमाउँदै पूरा गर्यो ।

चेन्नईका ओपनर ऋतुराज गायकवाडले ४४ बलमा १२ चौका सहित सर्वाधिक ७५ रनको योगदान दिए । फाफ डु प्लेसिस ले ३८ बलमा ६ चौका र १ छक्का सहित ५६ रनको योगदान दिए । मोईन अली १५, रविन्द्र जडेजा ७ र सुरेश रैनाले १७ रन बनाए ।

चेन्नईलाई ओपनर ऋतुराज गायकवाड र फाफ डु प्लेसिस १३ ओभरमा १ सय २९ रनको उत्कृष्ट साझेदारी गरेपछि चेन्नईले सानदार जित हात पारेको हो । स्पिनर राशिद खानले ऋतुराज गायकवाडलाई बोल्ड गर्दै साझेदारी तोडेका थिए । फाफ डु प्लेसिस र अलीलाई राशिदले आउट गरेका थिए । हैदराबादका राशिद खानले ४ ओभरमा ३६ रन खर्चेर ३ विकेट लिए । अन्यले विकेट लिन सकेनन् ।

त्यसअघि दिल्लीमा टस जितेर पहिला ब्याटिङ थालेको हैदराबादले निर्धारित २० ओभरमा ३ विकेट गुमाउँदै १ सय ७१ रन बनाएको थियो । हैदराबादका मनिष पाण्डे ४६ बलमा ५ चौका र १ छक्का सहित सहित सर्वाधिक ६१ रनको योगदान दिए । कप्तान डेविड वार्नरले ५५ बलमा ३ चौका र २ छक्का सहित ५७ रनको योगदान दिए । वार्नर आइपिएलमा ५० अर्धशतक पूरा गर्ने पहिलो खेलाडी बनेका छन् । त्यस्तै करिअरको टि२० मा १० हजार रन पनि पूरा गरेका छन् ।

आक्रामक अन्त्य गर्दै केन विलियम्सन १० बलमा ४ चौका र १ छक्का सहित २६ रनमा अविजित रहे । केदार जाधव १२ रनमा अविजित रहे । चौथो ओभरको दोस्रो बलमा ओपनर जोनी बेयरस्टोलाई हैदराबादले ब्यक्तिगत ७ रनमा गुमाएको थियो ।

साम करनले दीपक चाहरबाट क्याच गराउँदै पहिलो सफलता दिलाएका थिए । तर दोस्रो विकेटका लागि वार्नर र मनिषले ८७ बलमा १ सय ६ रनको साझेदारी गर्दै मध्यम योगफलमा पुर्याएका थिए ।

वार्नरलाई १८ औं ओभरको पहिलो बलमा लुन्गि एनगिडीले रविन्द्र जडेजाबाट क्याच गराउँदै उक्त साझेदारी तोडेका थिए । यसै ओभरको पाँचौ बलमा मनिष फाफ डु प्लेसिसबाट क्याच आउट हुन पुगे । चेन्नईका तीव्र गतिका बलर लुन्गी एनगिडीले ४ ओभरमा ३५ रन खर्चेर २ विकेट लिए । साम करनको नाममा १ विकेट रह्यो । चेन्नईले अव शनिवार मुम्बईसँग खेल्ने छ । हैदराबादले आइतबार राजस्थान रोयल्ससँग खेल्ने छ ।

अंक तालिका

यो जितसँगै चेन्नई ६ खेलमा ५ जित र १ मा हार सहित १० अंक सहित शीर्षस्थानमा उक्लिएको छ । बेंगलोर ६ खेलमा ५ मा जित र १ मा हार सहित १० अंक भएपनि नेट रनरेटको आधारमा दोस्रो स्थानमा छ । दिल्ली ६ खेलमा ४ मा जित र २ मा हार सहित ८ अंक सहित तेस्रो स्थानमा छ । मुम्बई ५ खेलमा ३ मा हार र २ मा जित सहित चौथो स्थानमा छ ।

कोलकाता ६ खेलमा ४ मा हार र २ मा जित सहित पाँचौ स्थानमा छ । पन्जाब ६ खेलमा ४ मा हार र २ मा जित सहित ४ अंक जोड्दै छैटौं स्थानमा छ । राजस्थान रोयल्स ५ खेलमा ३ मा हार र २ मा जित सहित ४ अंकका साथ सातौं स्थानमा छ । सनराइजर्स हैदराबाद ६ खेलमा ५ मा हार र १ मा जित सहित २ अंक जोड्दै पुछारमा छ ।