एजेन्सी – अष्ट्रेलिया ओपनर डेविड वार्नरले टि२० क्रिकेटमा आफ्नो १० हजार रन पूरा गरेका छन् । वार्नर टि२० क्रिकेटमा १० हजार रन पूरा गर्ने चौथो खेलाडी हुन् । अष्ट्रेलियाबाट टि२० क्रिकेटमा १० हजार रन पूरा गर्ने ऐतिहासिक पहिलो खेलाडी बनेका छन् ।

इन्डियन प्रिमियर लिग (आइपिएल) मा बुधबार सनराइजर्स हैदराबादका कप्तान वार्नरले चेन्नई सुपर किंग्सविरुद्ध ५५ बलमा ३ चौका र २ छक्का सहित ५७ रन बनाउनेक्रममा टि२० करिअरको १० हजार रन पूरा गरेका थिए । वार्नर आइपिएलमा ५० औं अर्धशत प्रहार गर्ने पहिलो खेलाडी पनि बनेका छन् । यसअघि टि२० आई क्रिकेटमा १० हजार रन वेस्टइन्डिजका दुई र पाकिस्तानका एक खेलाडीले मात्र पूरा गरेका थिए ।

टि२० क्रिकेटमा सर्वाधिक रन क्रिस गेलको नाममा छ । गेलले ४ सय १४ इनिङमा १३ हजार ८ सय ३९ रन बनाएका छन् । दोस्रो स्थानमा वेस्टइन्डिजका काइरन पोलार्ड छन् । पोलार्डले ४ सय ७९ इनिङमा १० हजार ६ सय ९४ रन बनाएका छन् । पाकिस्तानका सोएब मलिकले ३ सय ८९ इनिङमा १० हजार ४ सय ८८ रन बनाएका छन् । वार्नरले ३ सय ३ इनिङमा १० हजार १७ रन बनाएका हुन् ।

अष्ट्रेलियाबाट वार्नरपछि सर्वाधिक रन टि२० मा कप्तान आरोन फिन्चले बनाएका छन् । फिन्चले ३ सय १४ इनिङमा ९ हजार ७ सय १८ रन बनाएका छन् । आइपिएलमा वार्नरपछि सर्वाधिक अर्धशतक दिल्ली क्यापिटल्सका शिखर धवनले ४३ प्रहार गरेका छन् । बेंगलोरका एवि डिभिलियर्स, विराट कोहली र मुम्बईका राहित शर्मा ४०-४० अर्धशतक प्रहार गरेका छन् ।